WINDHOEK – Okoola yomomunute omu-50 komutulimo weekoola waNamibia Peter Shalulile noku liwayela okoola mwene kwa ningwa kuEssay Tesfai waEritrea, okwa eta Namibia opo a pupule
Eritrea eekoola 2-1, moudano wavo wokuwana okuya kefiyafano lekopi lounyuni mo2022 koAsmara.
Shalulile oo oye a li kapteina wospana natango okwa ninga ependafule loshilongo eshi a tula mo okoola
yotete youdano nokupatulula 1-0 konima yominute 50 –ominute ashike dinini –eshi va dja pokafimbo
kefudepo. OBrave Warriors oya endulula vali evalulo layo nokukala i na eekola 2-0, eshi eshi ya kwafelwa kuTesfai oo a li e na elalakano loku fangela etanga kokule nokoola yavo, a fangela etanga monete yambulavo, noku li pa okoola ye mwene.
Ashike eekoola edi mbali inadi shololifa ospana yoRed Sea Camels yaElitrea oyo ya kala tai kondjo
nokufanga okatanga ye ka yukifa komesho, fiyo Ali Suleiman e shi pondola nokutula etanga monete
yovatalelipo momunute omu -65. Ovaeritrea ova kala nokuli neinekelo kutya pamwe onava ka mone oshikumwifalonga, ashike Namibia okwa tunga po ekuma lomakanda taa keelela nokomayoo noku eta efindano leekoola 2-1 keumbo, naashi oshe va tula pondondo iwa oku ya pedingonoko etivali.
Oudano ou wedingonoko etivali owa teelelwa u kale ko mEtivali tali ya kokapale kaSam Nujoma Stadium
moWindhoek. Oku omudeuli wopakafimbo Bobby Samaria netanga laye ova teelelwa opo va lyate omahooli opo Namibia a dule oku ya kedingonoko la landula ko loku wana oku ya kekopo lounyuni.
Menenedu, Eritrea okwa talika ko onga Simon yaMalombo ngee tashi ya kokatanga kokeemhadi
shaashi oye a etelela okano momusholondodo weespanda moAfrica, noku li po 202 mounyuni. Ka li
nande efiku a li a wanene oku ka dana ekopi loiwana yaAfrica (Afcon) ile a ya kedingonoko laxuuninwa
lokuwana okudana mekopi lounyuni.
Ashike oudano wonghela okwa li tau dimbulukifa Samaria kutya ine va dina ile e va talele pondodo
opo ve li momusholondodo weespana dokatanga kokeemhadi mounyuni. Brave Warriors oku li pondodo 30 muAfrica nopou 121 mounyuni. Elalakano lokudana oudano wokuwana okudana mekopi lounyuni oo okuninipika espana dili 211 dokatanga moilongo aishe mounyuni noku kala po ashike neespana 32 odo tadi ka dana mekopi lounyuni.