Nonande omupresidente Hage Geingob a ingida kutya Namibia ola patuluka, ovanafikola natango onghee va teelelwa va kale momaumbo.
Omunambelewa omukulunhu moshikondo shelongo Sanet Steenkamp okwa shivifa mexuliloshivike kutya ounona otava ka shuna ashike kofikola momafiku 03 Aguste neudo. Ashike Steenkamp okwa yeleke yoo kutya eefikola otadi patuluka nena, novahongifikola aveshe ova teelelwa va kala va ye kofiola nena, ashike ounona otava tameke muAguste. “Ouministeli ou udite ko kutya ovalongi vamwe ohava di komakule, nomolwa epato olo la kala po otava ende oinano okutya keenhele neenhele op ova fike koilonga, onghee otava pewa fiyo omafiko 11 Mai (Omaandaxa taeya), opo ve li lopote koilonga. Kape na nande omunashilonga peefikola a teelelwa opo eli lopote konima yomafiku 11 Mai,” Steenkamp ta ti.

Steenkamp ta ti ovahongi otava pewa efimbo loshikako olo la xupa ko opo va longekide eefikola noku di wapaleka, pamikalo doku eta po omilandu da tulwa po koWHO opo ku keelelwe etandavelo lombuto.  “Ofikola otai tameke mefiko 03 Aguste 2020, noilonga yoshikako oshititatu,nova nafikola aveshe ova teelelwa mefiku omo. Fye onga oshikondo shelongo, ohatu ka twikila neenghendabala detu doku fya oshisho kutya ovanailonga moshokondo shetu, nounona ova amenwa,” Steenkamp ta ti.
Ta pandula yoo ovalongi novanashilonga aveshe moshikondo shelongo ovo va kala tava longo noudiinini okudiilila komaumbo avo pefimbo lepato.