Victoria Kaapanda 

ONGWEDIVA- Onkalo ya kala ya dhigupalela osikola Panduleni Primary School unene ngele tashi ya kiilongitho yomaludhi ga yooloka yosikola, oya li ya thiminike osikola opo yi ningi omayindilo kiikando ya yooloka, sigo eyindilo lyawo lya li lya ziminwa kehangano lyoDebmarine Namibia.

Ehangano ndyoka olya li lya kwathele osikola ndjoka nokompiyuta yimwe oshowo eshina lyokuninga ookopi dhoombapila lyongushu y thike po N$40 000.

Bernard Namoonde, omulongisikola posikola mpoka okwa li a lombwele onzonkundaneki ndjika ta ti, enyanyu posikola yawo kombinga yekwatho ndika ongambishi e li megumbo mwa tselwa, oshoka Debnmarine Namibia oya longa oshinima oshinene nosha kandula po omukundu kaalongi nokaalongwa.
“Otwa kala tatu longo nuudhigu, ihe nena out shi okupandula. Osha li petameko lyomvula ndjika sho twa li twa gongala atuhe aalongi yoposikola mpaka nokukundathana nkene tu na okuninga omayindilo nokukandulapo omikundu ominene dha taalela osikola,” Namoonde ta ti ngaaka.

Ta hokolola ta ti nonande ya ningi omayindilo komahangano  ga yooloka nogamwe  ga galula kutya opo taga ningi omalongekidho nkene ge na okuyambidhidha, natango oya tala kiipala yaamboka taya vulu okuyambidha naashoka taya vulu okukwathela nasho.

Stella Iipinge gwomokomitiye tayi ithanwa Debmarine Namibia Social Investment, okwa ti ohashi kala aluhe enyanyu kuyo ngele taya kwathele mboka ya pumbwa shili ekwatho. Haalushe oshigwana ashi kala sha tala moshiketha shepangelo ihe olya pumbwa okutsakanekwa mpoka lya vula okuhulila.

“Sho twa li twa mono eyindilo lyosikola ndjika, otwa li twa kuutumba nokukundathana uunene womawupyakadhi osikola ya taalela, nosha li she tu nengeneke opo tu kwathele neshina lyokuninga ookopi oshowo okompiyuta,” Iipinge ta yelitha.

Iipinge ta ti elongo olyo oshipatululo shonkalamwenyo ya kahe, nolya pumbwa okusimaneka unene ngele tashi ya koompumbwe ngaashi ndhoka.

Omukuluntusikola posikola Panduleni, Kapenda Jesaya Hafeni okwa li a pandula Debmarine Namibia sho a li e ya kondo omagalu noku ya longitha hwepo sho ya li ya kwatha naashoka ya gandja.
 Ta ti ota pendula wo omulongisikola Namoonde ngoka oye a li e ya po nenedhiladhilo ndyoka kutya naya ka tse oongolo peni opo ya mone ekwatho.

“Omwaalu gwaalongwa yetu otagu ende gwa uka pombanda, otwa talela omashongo ogendji notwa pumbwa omukuluntu gwiilongwa posikola, otwa pumbwa oongulu mbali,  ongulu yoshipeleki shimwe, oondoloma niikwawo oyindji itaatu mana oku yi popya nena,” Hafeni ta yelitha.

Osikola ndjoka yi na oku za oshikunino sigo ondondo ontiheyali oya li ya totwa po momvo 1996, noyi na aalongi ye li omugoyi mwa kwatelwa omukuluntusikola nomwoopaleki gumwe oshowo aalongwa ye li 260 nuumvo, mboka taya kala 272 omumvo tagu ya.