WINDHOEK- Omukuluntu gwelongo moshitopolwa shaKhomas Gerard Vries pamwe nelelo lyoshilando shaWindhoek otaya longo pwaa na oluthuwo ya kwashilipaleke kutya omeya nolusheno oya galukila moosikola omugoyi moshilando. Shika osha landula oshifo shoConfidente sho sha li sha shanga kutya oshiwike shika elelo lyondoolopa yaWindhoek olya li lya ti otali ka teta ko omeya koosikola omugoyi omolwa oongunga dhiifuta yi vule oomiliona N$55. Oondjo ndhoka odhi na oomvula mbali naashika osha thiminike elelo lyoshilando lyi tete ko omeya nolusheno goosikola ndhika mEtitatu.

Oosikola ndhoka dha gumwa odho Auas Primary School, Tobias Hainyeko Primary School, Concordia College, A. Shipena Secondary School, Windhoek High School, Windhoek Technical School, Dagbreek naNamibia Primary School.

Gumwe gwomaalongi yokoConcordia ngoka a popi noshifo oshimwayina naashika shoNew Era ohela okwa koleke kutya aanambelewa yamuni oya li ya talelepo osikola mEtitatu nelelakano lyokuteta ko olusheno lwawo. Okwa ti kaya li ya mona okaketha hoka ashike oya ti otaya galuka ye lu tete ko.
Sho a pulwa kombinga yomeya, okwa ti omeya inaga tetwa ko natango naalongwa mboka ye li momuhandjo oye li nawa.

MuJanuali, oshikondo shelongo moKhomas osha li wo sha indile elelo lyoshilando kali tete ko omeya nolusheno lwoosikola dhepangelo dhi li 123 omolwa oongunga.
Moonkundatha ohela, Vries okwa koleke kutya dhimwe dhomoosikola ndhika omugoyi odhi na omeya nolusheno lwa tetwa ko.

“Eeno ondi na uuyelele moshinima shika. Otatu ka ya momutumba nelelo lyoshilando opo tu shi potokonone,” ta ti ngaaka.

Sho omeya nolusheno lwa tetwa ko koosikola, omalelo goosikola anuwa oga tameke okutuma aanona mboka haya zi momuhandjo komagumbo. Oosikola kadha li tadhi vulu okugandja omayakulo ngaashi iikulya, omolwa okwaa na olusheno nomeya. Vries ta koleke wo kutya etetoko lyolusheno nomeya otali gumu nayi omihandjo.

Ashike okwa ti odhanakalindi kutya aalongwa oya tumwa komagumbo.
“Otashi gumu omihandjo ashike otatu kambadhala okumona eyamukulo nena moshigongi. Otwa ninga omalongekidho gokutelekela pomahala galwe tu pe oosikola ndhika iikulya. Iikulya otayi ka telekwa komihandjo dhoosikola dhilwe. Kape na nando omulongwa a tumwa kegumbo, ngele ope na mboka ya tumwa, nena osha ningwa pwaa na epitikilo okuza kutse,” ta ti ngaaka.