Victoria Kaapanda
ONGWEDIVA - Elelo lyondoolopa yaNgwediva otali longekidha esiku lyowina ndyoka tali ka thiga ondoolopa yaNgwediva nondjokonona mOmasiku 24 gaNovemba nuumvo.
Esiku ndyoka otali ka kombelela aanangeshefa ayehe aashona naamboka yopokati haya longo iilonga yookonyala, oshowo haya eta po iilandithomwa yawo kuyo yene okuza momagumbo gawo opo ya ka ulike nokushingitha iipindi netompelo lyokuhimitha uuhupilo komeho.
Omukuluntu gwomakwatathano mombelewa yelelo lyondoolopa yaNgwediva Jackson Muma okwa ti omauliko giipindi ngoka otaga ka kala ko ashike esiku limwe okuza oowili dhongula sigo ohetatu yokongulohi.
“Iishingithomwa mbyoka tayi ka landithwa esiku ndyoka ongaashi oonyama dha yothwa, iikulya ya telekwa nawa, iikulya yOshiwambo yi ili noyi ili, kehe shoka sha longwa noonyala ngaashi omathano nenge iiyuma niimbale, iikutu nosho tuu”. Muma ta ti ngaaka.
Ta gwedhapo ta ti otaku kala wo omayinyanyudho ga yooloka, oshowo ehala lyuununo lyokudhana nalyo oko tali ka kala.
Muma okwa ti elalaka lyokuyapo nomashingithilo gesiku limwe, okuhumitha oshimaliwa mondoolopa yaNgwediva oshowo okupa aashingithi ompito yo ku ulika iilandithomwa yawo.
Omahala gokulandithilwa iikunwa otaga kaahilwa kooN$550 manga omahala omakwawo taga ka hiilwa kooN$250. Kehe ngoka ta ka thika esiku ndyoka lyomawuliko giipindi mOngwediva Trade Fair Centre ota ka pita oshali shamuhongi pomweelo gwokuya meni.
Omwaalu gu thike paantu 1500 sigo 2 000 lwaampoka ogwa tegelelwa gu kale gwa thika esiku ndyoka omanga aalandithi 25 ya tegelelwa ya kale ya kutha ombinga momawuliko giipindi siku ndyoka.
Aashingithi taya tsuwa omukumo opo ya kale ya kutha ombinga esiku ndyoka, ashike otaya ka hogololwa sha ikwatelela kongushu yiilandithomwa yawo.
Iilandithomwa mbyoka tayi ka kala ya faathana, ihe tayi pitilile omwalu ngono gu na okukuthwa otaya kaningilwa ethigathano, nedhina ndyoka tali ka papidhwamo ekwanelago olyo tali ka kuthwa po.
Oofoloma dhoku udhitha otadhi adhika komalungungula (www.ongewediva.com.na) nenge pOngwediva Trade Fair Centre.