ONGWEDIVA - Nonande iimbuluma, ya kwatela mo omakwatonkonga niiponga yiihauto moshitopolwa shaHangwena nuumvo yayi pombanda, omiyonena dhomadhipago moshitopolwa odha shuna pevi noopelesenda 35.
Ngoloneya Walde Natangwe Ndevashiya shika okwe shi popi nokupupula etanga lyegameno kombunda ta ti olyo lya eta po elunduluko momuyalu gwiikulumuna mbika tayi yemateke noonkondo.
Ngoloneya nguka omupe okwa ti, omanga etanga lyegamena netanga lyopolisi inali longitha oonkondo lya pewa kepangelo, oshitopolwa shaHangwena osha li sha lopata iipotha yi li 4038, mo2018.
“Otwa ndhindhilike kutya iilonga ayihe iiwinayi moshitopolwa ohayi holoka omolwa omashongo ga taalela oshitopolwa, ngoka haga thiminike unene aanyasha ya ka longe iilonga inaayi uka, mbyoka hayi eta uupyakadhi,” Ndevashiya ta ti ngaaka.
Ndevashiya ta ti, oya ndhindhilike kutya ayihe a zi nokutumbula, oya yi pombanda noopelesenda dhontumba, omolwa oompito dhiilonga kaadhi po oshowo ekanitho lyiiyemo mokati kaanyasha negwopevi lyoshimaliwa moshitopolwa, omolwa ombuto yoCovid-19.
Ngoloneya okwa ti oye na okutula miilonga nokugwanithwa po ayihe ya nuninwa ooproyeka noprogalama moshitopolwa pokati kuuministeli nombelewa onene yoshitopolwa.
Ta gandja oshiholelwa shoopoloyeka dha ningi uule nethimbo dha tegelelwa okupita ihe inadh ipita.
Okwa tumbula natango okapale ketanga oshowo omahala gaalongi inaga pwa okutungwa natango.
“Ngele oshigwana otashi yambidhidhwa noshimaliwa pethimbo, opo shi vule oku ikwathela, okupitila moopoloyeka oshowo mooprogalama ndhoka, omawupyakadhi oshowo iimbuluma moshitopolwa otayi shuna pevi,” Ndevashiya a popi ngaaka.
Ngoloneya ta ti, ope na ompito onene yiilonga moshotopolwa okupitila muunamapya, okutunga ondoolopa nomatalelepo moshitopolwa. Ngaashi okugandja ookontalaka kaakalimo yomoshitopolwa sha ikolelela kuunongo wawo.
Ta ti okuwete kutya aanyasha yomoshitopolwa shika oyo aaleli naakomeho monakuyiwa, nosha pumbiwa ya kale taya mono oshipambu shomavi oshowo oompito miinakugwanithwa tayi longwa ngashiingeyi.
“Ngele aanyasha oya kala ye na ompito mwaayihe mbyoka, otaya vulu okugandja omayele taga vulu okutunga oshigwanwa nena nomonakuyiwa,” Ngoloneya ta ti ngaaka.
Okwa ti, ota kwashilipale kutya ombelewa ye oyi na okulonga nuudhigini opo yi gwanithe po ashihe sha li shi na okulongwa kaanyasha okupitila moopoloyeka omumvo gwa yi.
Ngoloneya ta popi ta ti, pethimbo e li koshipumdi, ayihe mbyoka inaayi pwa, nenge ya li ya nyengana moshitopolwa shaHangwena oyi na okugwanithwa po, noshitopolwa oshi na okuhumithwa komeho oshowo okugandja oompito dhiilonga kaanyasha.