Victoria Kaapanda

ONGWEDIVA –Omuhikingalo Gideon Nelumbu (Kinzzo) ngoka a li ha hiki pamwe naMateus Shipushu a tseyika nawa nedhina Fimbiko, okwa hokololola kuume ke onga omunyanyukwi nomuholi gwaantu.
Fimbiko ngoka a valwa momasiku 4 Kotoba 1992, okwa hulitha ongula yOmaandaha moshipangelo oshinene shaShakati, omasiku sho ga li 10 gaFebuluali. Kinzzo okwa ti okwa dhengwa ondhimbo onene. Ta popi ta keme ta ti okwa li taya tsu oondjodhi oonene pamwe nakuume ke, ihe payife ya dha yonuka. “Okwa li tatu dhiladhila okudhana oshinyandwa shetu sha towola notashi hokitha momwedhi twa taalela pamwe naFimbiko, oshoka okwa li onkulungu ngele tashi ya kiinyandwa. Kuume kandje a thigindje po,” Kinzo ta ti ngaaka. Ta hokolola ta ti, Fimbiko okwa li omumati gwomashandjo, ka popya oshitya e to kala ino imemeha, shapo ino uva sho a popi. Oya kala pamwe nakuume ke oomvula dha pita puheyali.

Kinzzo okwa lombwele Kundana ta ti, sho ya kala naFimbiko oya hika pamwe oongalo odhindji moka ya li ya pititha oalbuma yedhina “Iimwaku” ndjoka kwa li ya sindana nayo momathigathano goongalo gokomumvo omvula ya zi ko.

‘Kape na esiku tandi dhimbulukwa nda nyenyeta naFimbiko nenge a geela ndje. Sho tandi hokolola kutya okwa li omunyanyukwi nomuholi gwaantu kasha shi okupopya mokana ashike, ihe oshoshili,” Kinzzo a fatulula.

Omupambele gwaFimbiko Veiyo Utanga okwa ti eso lyaFimbiko olye ya ombaadhilila. 
Utanga ngoka a li ha zi naFimbiko megumbo lyahe mOshakati mEvululuko, okwa ti Fimbiko ina nyenyeta nande uuwehame washa, kakele okweehama omutse. “Omutse gwaFimbiko ogwa tameke Osoondoha ndjoka nda li nde mu fala koshipangelo e ta pangwa nokushuna kegumbo. Nonande okwa li ta ulike oshilumentu Omaandaha ngoka okwa li nde mu shuna ko koshipangelo ongula, hoka a ka hulithila,” Utanga ta popi ngaaka. Utanga okwa ti okwa kanitha omumwayina gwomwenyo omwaanawa, omuvuliki oshowo omunankondo nomwidhidhimiki.

Fimbiko okwa li omuhikingalo nomudhani gwiinyandwa. Okwa hiki naahikingalo ya yooloka aaNamibia.
Fimbiko okwa kokele mOngwediva pamwe nayinagona, okwa yambukile momukunda Onamatanga mOndonga. Okwa thigiko aakuluntu ye ayehe namwiyina.