Omupresidente Hage Geingob mEtiyali okwa li a tumu etumwalaka lye lyoluhodhi kofamili yAanamibia yatatu mboka ya li anuwa ya yahwa nokudhipagwa ketanga lyegameno lyaBotswana – Botswana Defence Force (BDF), sho a li a monathana nofamili megumbo lyepangelo. 
Aapambele mbaka yatatu oya li ya tongololwa onga Tom Nchindo, 48; Wamunyima Nchindo, 36; nomunamimvo 40 Martin Nchindo oya li ya yahwa okusa opamwe naSinvula Munyeme (oomvula inadhi tseyika). Aalumentu mbaka yane oya li anuwa ya yahwa kiilyo yo-BDF komunkulo gwomulonga gwaChobe momasiku 5 Novemba 2020. 

Geingob okwa li a monathana nofmili ndjika nomosheendo she omwa li Omupevipresidente Nangolo Mbumba, Omuprima Saara Kuugongelwa-Amadhila nOmpehaprima Netumbo Nandi Ndaitwah.  Omushangwa gwa monika koNampa gwa za kombelewa yapresidente ogwa ti omutse gwoshilongo, pethimbo a li momutumba nofamili, okwa li a ti oshiningwanima shika oshiwinayi.

“Sho tatu tsikile okuninga omakwatathano getu ga kola naBotswana, onda hala okukwashilipaleka Aanamibia kutya egameno lyAanamibia osho wo ekalekopo lyoshilongo oya simana noonkondo,” Geingob ta ti ngaaka. Okwa ti oshiningwanima shika otashi ungwaungwa nasho pamuthika gwopombanda komapangelo gaali nomakonaakono gi imangwa kumwe otaga ka ningwa. Oshinyolwa osha li sha tsikile nokutya manga president inaa kala omutumba nofamili, Geingob okwa li moonkundathana dhopangodhi napresidente gwaBotswana, Mokgweetsi Masisi opo ya kundathane oshiningwanima shoka. Masisi okwa li wo a gandja etumwalaka lyehekeleko nokwa ti oshiningwanima oshiwinayi.

Deputy Commissioner gwopolisi yaNamibia Kauna Shikwambi mEtiyali okwa li a popi kutya opolisi kokantuntu kaImpalila oya li yu uvui omitopelo dhoondjembo, noya li ya ningi oshikonga pamwe netanga lyegameno, ashike kaya li ya mona po sha.

 “Esiku lya landula, Etitano lyomasiku 6 Novemba 2020, aantu yamwe oya li ya ka patulula epeko lyomuntu a kana, taya popi kombinga yaalumentu mboka ya li ya zi meguimbo ya ka ndjolola oohi ihe inaya galuka nkene ya yile momasiku 4 Nevemba 202,” Shikwambi ta ti ngaaka. Okwa gwedha ko kutya sha landula sho aantu ya patulula epeko lyaantu ya kana, aakalekipo yoveta nelandulathano oya li ya pulaapula oombushe miilonga koBotswana ashike inaya pewa eyamukulo kopolisi yaBotswana, ashike oy aka mona uuyelele wa za ketanga lyegameno lyaBotswana mboka ya li ya koleke kutya oya yaha aalumentu yane koKasane. -Nampa