WINDHOEK- Uuministeli wElongo, Uunkulungu nOmithigululwakalo owa li wa kunkilile kutya kape na oshikondo shelongo shopashitopolwa shi na uuthemba okulundulula okaliindeli koosikola dhepangelo inaapu gandjwa epitikilo kOmukuluntuwiliki muuministeli. Shika osha landula konima sho uuministeli mbuka wa li wa konenene kutya oshikondo shelongo moHardap nayilwe oya li ya gandja omishangwa tadhi ti esiku lyahugunina lyosikola nomuhandjo omasiku 2 Aguste, sha ningwa inapu gandjwa epitikilo okuza komukuluntuwiliki.

Momushangwa ngoka gwomasiku 25 Juli 2019 gwa za komukuluntu gwelongo gwopakathimbo  moHardap, Jacqueline Rukamba, ogwa ti aakuluntusikola oya tseyithilwa kutya esiku lyahugunina lyoosikola adhihe nomihandjo dhepangelo Etitano, 2 Aguste. Tagu ti wo oosikola otadhi pulwa dhi ninge omalunduluko kombinga yekonaakono.

Omushangwa nguka tagu gandja ishewe omatompelo kutya oshike sha eta etokolo ndyoka, taya ti kutya etokolo olya li lya ningwa opo ku talelwe nawa omakonaakono gaJuli/Aguste ngoka ge li metifa ngashiingeyi. Omukuluntuwiliki muuministeli welongo Sanet Steenkamp ta ti kutya okaliindeli kosikola ko2019 ota ka ti kutya oosikola otadhi ka fudha momasiku 9 Aguste 2019 nosho tashi kala ngaaka.

Ta takele omunwe iikondo ayihe yelongo mbyoka ya gandja elombwelo lya tya ngaaka ya yi talulule oshinima shoka nokukwashilipaleka kutya omakonakono otaga yi komeho pwaa na omayimbo gasha.
Okaliindeli koosikola ko2019 otaka ulike kutya esiku lyahugunina lyoshikako oshitiyali omasiku 9 Aguste. Okaliindeli haka ta ka ulike ishewe kutya esiku lyahugunina lyaalongisikola 13 Aguste. 

“Oshitopolwa ashike shaMaheke sha pewa epitikilo okulundulula okaliindeli konima sho ya li ya ningi eindilo, ashike shika osha pewa ashike mboka ye li momihandjo moka omalongekidho gowina ge na okuningwa kombelewa yopashitopolwa pamwe noosikola opo ku kwashilipalekwe kutya aanasikola mboka otaya mana okushanga ekonaakono nuupu.