Victoria Kaapanda

OSHAKATI-Omwiimbi gwoongalo, Kambwali Sally a tseyika nawa Henny-Jive okwa pititha oalbum omwedhi gwa yi ndjoka tayi nyuwitha omakutsi gakehe ngoka te yi pulakene.

Henny-Jive ngoka te shi enditha nawa moalbuma ye yotango yedhina “Still on the Highway” ndjoka tayi dhana onkandangala moNamibia alihe nuunene monooli ayihe, uule wiiwike mbyoka ya  piti, okwa tamekele oku imba oongalo mo2005 sho a li a pititha okangalo kamwe nonande a kala noku imba omanga  eli mosikola.

Moonkundathana naKundana oshiwike shika Henny-Jive okwa ti, ye oha iyithana onge omuhikingalo gwoshili lela oshoka ke na kutya oha hiki oongalo dholudhi luni ashike kehe ashike oludhi longalo ambala omo lu li moalbuma ye ompe.
Okwa li a londodha kutya nuumvo otapu ka tya pwaka, oshoka aaholi yoongalo dhe okwe ya longekidhila oongalo dhokili oombwanawa kaa ku na we.

“Elalakano lyandje lyokuluka noalbuma yandje “Still on the Highway” oondyoka kutya oalbuma yandje ndjika oyo yotango ashike ondi li mondjila natango oku eta ooalbuma odhindji monakayiwa, inima iwanawa oyi li mondjila natango”. Henny-Jive ta ti ngaaka.

Okwa tseyitha kutya oalbuma  oyi na ehwata lyoongalo 16 ndhoka dhi li mumwe ano omaludhi ga yooloka, nandatu dhomudho okwe dhi pititha uuvidio omvula ya zi ko.

Moongalo adhihe dhi li moalbuma okwa li a kwathelwa kaahikingalo ya yooloka ngaashi omushiki ngalo gomuSouth Afrika Nosholola oshowo Obie, Appolause, Nafi, Tilla Chux, Elly, Nezzy Fresh naElly boy.

“Onda pandula kehe gumwe a kala nokupa ndje omukunmo okutsikila nokwiimba oongalo dhandje, kaa ndi hulile ondjilakati, oshowo kehe ngoka ali a kwathele ndje mokwiimba ano Pamba ne ya pe omayambeko gongushu”. Henny-jive ta ti.
Ta gwedha po ta ti okwa li a mono oshiholelwa shokwiimba komuhikingalo a tseyika nawa gwedhina Exit ngoka ha hiki oongalo dhoKwaito, noku mu pa oshiholelwa oshiwanawa opo a vule okulandula oonkatu dhoka a li a ende opo a tameke okwiimba nokuthika mpoka e li nena.

Omuhikingalo nguka oha ende ta landitha oalbuma ye ndjoka tayi pulwa nayi nayi moshigwana naangoka te yi pula, ote yi mufalele ye mwene. Ta ti mositola inayi thika mo nantango nonande oyi li metifa okutsilikwa mositola.
Henny-Jive okwa li a gandja etumwalaka kAanamibia ayehe kutya, okunwa kwa pitilila kaku li mondjila, otaku shonopaleke oshigwana, iiponga oyindji tayi holoka methimbo lyopayife, otayi holoka aahingi ye li kohi yomalovu, ta ti nashi ninge ehulilo ya vule ya kwatelepo onakuyiwa yokomeho.

Kehe ngoka ta ka pumbwa oalbuma ndjoka tayi hakanwa oshoka uungalo wu li mo uutoye unene,  na dhenge kongodhi 081 8997 262