OMBUGA yaMUNYOKO - Omunawino woikwambaanga moshilongo Tomas Koneka Iindji okwa mona eumbo laye laxuunina komukunda wavo Ombuga yaMunyoko moshitukulwa shaShana Olomakaya.
Iindji okwa xulifa mepupi lomido 44 koshipangelo shopaumwene koWindhoek omwedi wa dja ko.
Otaku hokololwa kutya Iindji okwa ombokelwa pefimbo a li koshivilo shouvalelo wokuongela oshimaliwa oo wa li wa longekidwa kelelo lodoolopa yaNdangwa. Ovanhu tava tengenekwa ve fike 10 000 okwa li va ngungumama keumbo looIindji okuyandja efimaneko lavo laxuunina.
Ovalilifya va holoka omwa li mwa kwatelwa omupilimaminista Saara Kuugongelwa-Amadhila, hamushangadjai woSwapo Sophia Shaningwa, eeminista da yooloka, ovaleli vopamifyuululwakalo, ovanangeshefa, ovanailonga keembaanga da yooloka noshoyo ovafitaongalo.
Vahapu ova tanga Iindji ongomunambili, e hole okuyambidida ovanangeshefa.
Moshipopiwa sha leshwa ponhele yomupedupresidente woSwapo Netumbo Nandi-Ndaitwah, okwa ti Iindji okwa dana onghandangala yakula okuxwaxwameka ovanyasha va kale ve na oukumwe nokukaleka po oSwapo.
Nandhi-Ndaitwah okwa ti Iindji oye umwe vomovanyasha kwa li a fimaneke ovanangeshefa veendodo da yooloka.
“Iindji okwa li omukulunhu wehangano lovanangeshefa loNamibia Chamber of Commerce and Industry (NCCI) konooli. Pefimbo olo okwa li omulumenhu ta longo nondjungu okuyambula po eengeshefa moshilongo,” ta ti.
Okwa ti Namibia okwa kanifa omulumenhu ou kwa li e na owino neudeko kombinga yoikwambaanga.
“Omulumenhu ou okwa kufa ombinga mokuyambula po eliko loshilongo,” ta ti.
Nandi-Ndaitwah okwa ti Iindji okwa yambidida ongudu yavo yoSwapo pashimaliwa nokuyandja omayele nghene oshimaliwa tashi longifwa.
Okwa weda po ta ti Iindji okwa li a tota po oshikefa shoshimaliwa shedina Koneka Social Club ya nuninwa okuyambidida evava lovanyasha voSwapo.
Okwa ti ongudu yoSwapo oya pandula oilonga iwa ya longwa kuIindji.
Ov popi va yooloka ova tanga Iindji ongomulumenhu e na oshili, a fimaneka ovanhu veendodo da yooloka.
Ovakalimo vomomukunda wavo ova hokolola noluhodi tava ti Iindji okwa fiya po omwaka wa kula momukunda wavo shaashi okwa li alushe ehole okuyambidida ovanhu momukunda.
Ova ti Iindji kakwa li e na okatongo molwaashi okwa li a tala ko ovanhu ve fike pamwe. Omufitaongalo weongalo Othika, Hosea Namusha okwa ti Iindji okwa fiya po omwaka wakula meongalo lavo.
“Otwa kanifa omulumenhu kwa li alushe e hole okuyambidida ongeleka yetu noshimaliwa. Ongeleka yetu oya xuma nawa komesho molweyambidido twa pewa kuIindji,” ta ti.
Okwa weda po ta ti alushe ngeenge ve na oinyangadalwa meongalo Iindji iha faula okuholoka.
Okwa ti Iindji okwa li omulumenhu e hole ongeleka noku na etilokalunga.
Namusha okwa ti Iindji omulumenhu a li e hole okukufa ombinga mokuudifa.
Okwa weda po ta ti Iindji okwa li yoo vali omukulunhu weongalo.
“Iindji okwa li omwiimbi muwa. Ngeenge owa hange e li mongeleka oha imbi mokule yee ta yolo,” ta ti.
Iindji okwa fiya ko omukulukadi waye Iiyaalo Shiimi-Iindji nounona vavali voukadona.
Okaana kaye konghelo oke na ashike eemwedi mbali. -fhamalwa@nepc.com.na