Walvis Bay - Omunamimvo 47 ngoka ha hingi omaloli nokwa li a monika omukithi gwoCovid-19 mehuliloshiwike okwa li a ikanyuna kutya okwa li i iyaka mehala lyokwiikalela manga a li inaa monika omukithi. Oonkambadhala odhi li ngashiingeyi metifa 0kukonga aantu mboka ya kwatathana naye, mwa kwatelwa aaniilonga yaStandard Bank, omuhingi gwokataksi osho wo ofamili ye. Omuhingi nguka gwomaloli, pamwe namukwawo Jafet Ndjuluwa, oya li ya tidhwa miilonga sho anuwa ya li yi iyaka mehala moka ya li ya kalekwa nokuka talela po ookuume nofamili.

MEtine, mbaka yaali oya ti oya li ashike ya ka nyanya mo. Oya lombwele wo oshikundaneki shoNew Era kutya oya li ya pitikwa kokampani ya ye kStandard Bank ya ka konge omikuli, oshoka oondjambi dhawo odha li dha tetwa netata. Oya li ya pitikwa okukala pamwe naaniilonga ooyakwawo, okuya mehala moka hamu longelwa, na gumwe okwa li a pitikwa a ye kundokotola, Ndjuluwa ta ti ngaaka. “Ndyoka olyo ashike ethimbo twa li twa zi mo, notwa li tu wete inaashi puka okuka nyanya mo ngele otwa pitikwa okuninga iinima ayihe mbiya.
Okwa li a fatulula kutya oya li ye ya moNamibia okupitila koongamba dhaBuitepos momasiku 8 Mai noya thiki moWalvis Bay momasiku 10 Mai. Ethimbo ndika oya li ya yi kodepo yawo koWindhoek, Ok Grocer moGobabis nokomina yaNavachab moKaribib. “Otwa li ashike twa lombwelwa tu ninge omalweendo getu omafupi. Onkene oofamili dhetu odha kala noku tu etela iikulya. Inatu iyaka mo nando,” ta ti ngaaka.