Lasarus Hakwaake

EENHANA – Omunambelewa omukulunhu moshitopolwa Ohangwena Fillipus Shilongo okwa popya kutya omhumbwe yomeva oyo kwa didilikwa komukunda Ohaindubu moshikandjohololo Epembe oyo ya li ya ulikwa mokafilema komakwatafano opaengodi oya kandulwa po nale.

Shilongo okwa lombwela oshiwana kutya okafeelema oko taka tambulafanwa komapandja opamakwatano itaka ulike vali onghalo ngaashi ya li eshi kwa li ya ulikwa koradio yomudidimbe  momafiku 18 Juli 2019. 
Okwa twikila ta ti Ombelewa yelelo lOhangwena melongelokumwe neembelewa dikwao mokuyandja omeva koshiwana ova konga po omikalo dopokafimbo oshoyo omikalo tadi kalelele odo da nyamukula komhumbwe yomeva momikunda odo da dengwa da lila kenota. Dimwepo domomilandu dopokafimbo okunyamukula komhumbwe yomeva ode di kutya ombelewa yopashitukulwa Ohangwena opamwe naNamwater ova tameka nale okukala tava twala omeva kOhaindubu oshoyo keenhele dimwe da kumwa komhumbwe yomeva, opo ku kwashipalekwe kutya oshiwana oshi na omeva a yela okunwa. Epangelo ola yandja omandama omeva eelita 10 000 kOhaimbudu oshoyo komikunda dimwe di li momhumbwe, naNamwater oshoyo Otenga yomeva yetanga leameno ohava twala ko omeva komikunda keshe konima yoivike ivali.

Shilongo okwa ti dimwe domenghatu tadi kalelele oded i kutya Ouministeli womidingonoko okupitila moshikefa shomidingonoko oshoyo ouministeli wounamapya, omeva nomifitu owa mboola omboola pomukunda Oshidute oyo ya tukulila omeva komikunda ngaashi Omupanda, Omwii oshoyo Ohakafiya, omo yoo mwadja oshitayimunino sha twala omeva kOshikunde uninginino oshoyo oushilo. 

Okwa popya vali kutya epangelo okupitila mombelewa yomupilima, oshoyo mouministeli wounamapya okupitila mopologalama yoshikukuta ola yandja omutengenekwafaneko woimaliwa u fike pemilliona N$24,7 koshitopolwa Ohangwena opo ku kale kwa xulifwa po omhumbwe yomeva modula 2019-2020.
Oshimaliwa sha fanekwa otashi ka longifwa moku twa eemboola noku yandja omeva kOshikunde, Epembe oshoyo Omundaungilo oitopolwa oyo ya kala noku tyakalekwa kenota efimbo lile.