Victoria Kaapanda

ONGWEDIVA-Omusita payithano metanga lyegameno lyaNamibia Simeon Simon Valimo Kandjala okwa thaneka oku ka patulula ehangano lyomikithi dhoshipa momasiku 04 gaApilili omvula tayi ya.
Kandjala okwa ti ehangano tali ithanwa Namibia Skin Diseases Organisation Association (NSDO) enene dhiladhilo lye mwene. 

Okwa tegelela lyi patuluke pambelewa ngele lya pitikwa kUuministeli Wundjolowele nOnkalonawa, ndyoka tali ka kala nombelewa onene mOWindhoek oshowo iitayi yehangano ndyoka kehe moshitopolwa.
“Ehangano ndika onde li eta po konima nda dhimbulula nkene aakwashigwana ya kwatwa kuuvu woshipa haya mono iihuna moompito dha yooloka.Onda ehama omukuthi gwoshipa tagu ithanwa Psoriasis okuza mo 1987, sigo nena ondi li kohi yepango,” Kandjala ta ti ngaaka.

Ta hakolola ta ti okwa li a dhimbulula aantu ye na omikithi dhoshipa ya taalela omashongo oshowo okatongotongo, hoka ka pumbwa okulwithwa nokuhulithwa po opo aantu mboka ya kale ya talika ko shi thike pamwe nooyakwawo opo ya kale woo ya manguluka.

Ehangano ndyoka otali ka kwathela aakwashigwana ayehe ya taalela omikithi dhoshipa ngaashi Psoriasis/Psoriatic Arthritis and Lichen Planus/plaque, Acne, noEczema, Vitiligos, Leprosy nomikwawo odhindjidhindji.

Kandjala ta ti ehangano otali ka kala tali gandja omalongo oshowo omahungomwenyo nkene ye na okutaamba ko omikithi dhoshipa dha yooloka oshowo okuhulithapo okatangotongo mokati kaa mboka ye na omikithi dhoshipa.

Ehangano olyaakwashigwana ayehe moNamibia, notali ka kala lya kwatelwa komeho kaantu mboka ya enda momawupyakadhi dhomikithi dhoshipa oshowo mboka ye na ehalo okugandja omawuyelele okupanga omikithi dhoshipa dha yoloka.

Okwa popi ta ti mo2010 okwa li a pititha okambo kedhina The “War Between My life and Death” moka a hokolola nkene a mono iihuna komukithi gwoshipa sigo e gu monene.