Lasarus Hakwaake

EEMBAXU – Ookamusela voshitukulwa Ohangwena ova ninga omaaneno avo oilonga koBilly Mwaningange Rural Development Centre va anifwa kuMangestrata Devy Kambinda woshitukulwa Eenhana. 
Koshiindingili oko tuu oko Erickson Ndawanifa, Kamusela woshikandjohoololo Omulonga okwa hoololululwa onga Omunashipundi wewilikongudu loshitukulwa Ohangwena. Eshi osho oshikando oshitivali moshikako oshitivali Ndawanifa ta hoololwa onga omunashipundi okudja mo 2015.

Vamwe po va hoololwa vomewilikongudu ovo Kamusela Ferdinand Ingashipola Shifidi wEndola, Ester Ndatala wOshikango naHilaria Ndjuluwa kokOndobe ovo oilyo ipe yewilikongudu Ohangwena. Eshi osho oshikando shotete mewilikongudu lOhangwena mwa hoololelwa etata loomeme. 

Keumbo etivali lomutumba wopashiwana okwa hoololelwa Olivia Tuyenikelao Hanghuwo woshikandjohoololo Eeenhana, Lonia Shinana Kaishungu wOshikunde naElkan Hainghumbi wEngela. Oilyo ikwao yookamusela oyo Lebeus Efraim wOkongo, Matheus Shikongo wOngenga, Johannes Hakanyome Ohangwena, Festus Ikanda Omundaungilo naMatheus Nanghama Epembe.

Moshipopiwa shaye shetambuleko, Ndawanifa okwa popya kutya okwe lilongekida okulonga ngaashi ta dulu okukwashilipaleka kutya omayakulo okwa fikifwa koshiwana. Okwa kunghilila ookamusela vakwao kutya onghalo itai ka fafaana vali, nokwe va pula opo va longe noku lipaka mo pakuyoololamo eemhumbwe doshiwana. Okwa popya kutya otava ka longa nelituleno nonoudiinini opo ku hangwe ouxupilo uli hixwe paku xumifa komesho ovakalimo aveshe moshitukulwa. 
Okwa pula epangelo lopokati opo li kala la yandja oiniwe ya wana op ova dule oku hanga omafaneko o Harambee Prosperity Plan oshoyo omafaneko exumifokomesho oshiwana.