WINDHOEK – Omupresidente omukulu gwongongahangano yokatanga kokoompadhi kaNamibia (NFA) Frans Mbidi ohela okwa li i ikanyuna noku ikaleka kokule nomapopyo te ga ningilwa  kutya ye pamwe niilyo iikuluntu yoCouncil of Southern Africa Football Association (Cosafa) oya li ya iyambapaleke noodola omayovi omvula ya za ko. Mbidi, ngoka oye omupevipresidente gwoCosafa, pamwe naPhillip Chiyangwa Omuzimbabwe ngoka oye omukuluntu gwoCoasafa osho wo iilyo ayihe iikuluntu otaya nikwaanikwa kutya oya longa nuukengeleledhi nokwiiyambapoaleka noomiliona N$1,5 omvula ya za ko pethimbo ndyoka oCosafa ya li ya pititha kutya oya kanitha oshimaliwa shi thike poomiliona N$2,5.

Oshikundaneki shokoHarere shedhina NewsDay osha li sha lopota kutya omakonaakono gopashimaliwa ga ningilwa oCosafa gopaife otaga ulike kutya iilyo iikuluntu oya li ya mono oshimaliwa shi thike poomiliona N$1,4 omvula ya za ko. Tashi lopota kutya Chiyangwa oye a mona ko oshipambu oshindji, N$301 150,”
Oshifo shika tashi  tula wo Mbidi gwaNamibia miipathi, sho tashi ti okwa li a mono oshimaliwa shomondjila nomulalo shooN$156 850 omvula ya za ko.

Sho a a li a pulwa a tye ko sha koshikundaneki shoNew Era Mbidi okwa li a ti kutya omapopyo ngaka ogaafele no kage na ondjundo yasha, oshoka iimaliwa ayihe mbyoka a mona ethimbo ndyoka okwa li e yi ilongela noya li ya ndhindhilikwa momambo goCosafa.

“Oshiwike sha za ko oCosafa oya li yi na omutumba koJohannesburg nomapulo agehe gelongithin lyiimaliwa oga li ga pulwa hoka noga li ga yamukulwa mondjila, niilyo ayihe ya li koshigongi oya li ya nyanyukilwa omambo goCosafa ngoka ga li gu ulikwa komutumba. Oolopota ndhika otadhi nyateke ashike omadhina gaantu oshoka shoka iikundaneki tayi lopota kasha na uushili nando. Omambo goCosafa oga mangulukila kehe gumwe ngoka a hala oku ga tala, iimaliwa mbyoka oyetu. Sho hatu yi kiilonga yoCosafa, otundji ohatu tula mo omafudho inaaga futwa kiilonga yetu, sho osho Cosafa he tu futile sho tatu longo iilonga mbyoka. Inatu kutha iimaliwa kayi shi yetu, ihatu shi ningi,” Mbidi ta ti ngaaka.