Ofikola Mwadhina Gwanembenge Combined School ili mOshakati, oya pewa eekompiuta nanho kehangano leeshi loTshwaragano Fishing Ltd.

Eekompiuta odi li pongushu yoshimaliwa N$50 000 oda yandjwa onghela komupedu minista mouministeli weeshi eedjo domefuta, Silvia Makgone. 

Makgone okwa ti osha fimana ngeenge omahangano opaumwene taaya mbidida oshikondo shehongo unene tuu eefikola.

Makgone okwa ti ehangano loTshwaragano ola fimaneka ehongo nota li lalakanene okushakeneka epangelo ondjilakati tashi pitilile moku yambidida eefikola. “Ohandi indile omahangano a yooloka opo a kufeko oshihopaenenwa eshi shokuyambidida oshikondo shehongo,”  ta ti.

Onghee okwa ti oshikondo shehongo osha pumbwa oku ya mbididwa ku keshe umwe.

“Ngeenge ofikola ina oikwafifo ya wana otashi tu ovanafikola ve li honge nondjungu. Otashi kwafele yoo vali ovahongifkola va honge noupu,” ta ti.  Moshipopiwa shaye ngoloneya waShana Elia Irimari okwa kumaida ovanafikola va kale lalushe tava dulika kovahongifikola vavo noshoyo oku li honga nelitulemo. “Ngeenge omunhu a longwa oha ka ninga omunashilonga wokomongula momaifano a yooloka,” Irimari ta ti.

Omukulunhufikola wopofikola Mwadhina Gwanembenge Combined  School, Immanuel Aron okwa ti  eekompiuta otadi ka eta elunduluko kovanafikola molwashi otava ka longifa okukonga ouyelele mokompiuta ngeenge tava ningi oinyangadalwa yavo.

Okwa ti ofikola oya taalela omashongo a yooloka ngaashi  eengulufikola ina di wana noshoyo onhele yoluumbo lofikola li shona.

Aron okwa weda po ta ti ofikola oya taalela yoo vali eshongo lokuhe na okapale komaudano.

fhamalwa@nepc.com.na