WALVIS BAY – Victoria Shikongo (29) oo vati a dipaa okaana kaye, noku ka kutula omunino, okwa holoka onghela momhangulilo yaMangestalata moWalvis Bay.

Eshi a holoka momhangu, Shikongo okwa li a anyenwa opo e lifutile mo, omolwa omatamaneko avali te a ningilwa –ledipao, nolokuholeka oludalo. 

Otaku hokololwa kutya omukainhu ou a ninga omafiku koshipangelo shaWalvis Bay a kalelwa kopolifi okwa dipaa okaana kaye, e ka kutula omunino, konima ashike yoku ka mona. Oshiningwanima osha ningwa mEtine loshivike sha dja ko kolukanda ledina Tutaleni. 

Omukwatakanifi koshikondo shokulwifa oimbuluma mErongo Erastus Iikuyu okwa ti omukainhu ou vati okwa monena okaana moshilikoshelo, ndele te ka punyangele monailona ilaula, ndele te i holeke koshi yombete yaye. Ashike eshi mwene weumbo okwa haluka eshi e li twa mekungu lohonde ndele ta ifana opolifi oyo ya kwata po omufekelwa meendelelo.