Lazarus Hakwaake
EENHANA – Oshiwana shovakwanyama okudja moikadjo iheyali yomoikandjo ihetatu mOukwanyama ova ninga omunyanyo fiyo okeembelewa daNgoloneya woshitukulwa Ohangwena kEenhana nokuyandja omukandanyenyeto tava pula Ohamba nomalenga ayo amwe va kale va fiyapo oshipundi meemhadi ditalala. Tuhafeni Christian Ngashikwao okwa lesha ombapila yenyenyeto omo tava ti, okudja eshi Ohamba Meekulu Martha Mwadinomho Christian yaNelumbu a ningwa ohamba yOukwanyama momudo 2005, oshiwana shihapu oshe lihanga mehalakano linene, okatongotongo, etukauko, okukanifa ondjila, okuhe na ombili osho yoo ewiliko langhundipala ta li monika keshe pamwe. Otava ti koshi yewiliko laMeekulu ohamba, oufemba womunhu, emanguluko nounhu womunhu owa pondwa nokulyatelwa pedu.
Okudja mo2011-2019, okwa didilikwa nghee elelo la taataa oulengona oshoyo omalenga manene mOhaingu, Okelemba nomOhakafiya. Oovene vomikunda vahapu ova tewa tewa vamwe ova lundululwa naava tava lalakanene ouwa wohamba oshoyo omalenga ayo. Ashishe osho osha ningwa noku he li pulilako neenghedi domifyuululwakalo ile okutwala nande oikoya yavo i ka pwilikinwe komangu yomufyuululwakalo. Oshiwana mOukwanyama osha kendabala luhapu opo shi mone omalenga manene ohamba ndele eenghendabala adishe oda hanga okwena kwa fita.
Otava popi kutya ova ninga eenghendabala dihapu ngeno opo va ulikile Meekulu ohamba kutya elelo laye otali ehameke ovanhu ndele inashi kwafa sha. Dimwe domeenghendabala va ninga ova pulile opo va kundafane nohamba mo2016 ashike eindilo lavo ola kupulwa koshala; ova ninga omunyanyo wombili mo2014 noku ya kouhamba opo ngeno va ka kundafane omakemo avo nohamba opo napo Meekulu a nhukila poputenya nova dja ko eenyala dongaho. Ova ninga eenghendabala okuya kombelewa yoOmbudsman kOshakati ndele nako inava nyamukulwa ko, eshi oshikando oshitivali tava ningi omunyanyo oku eta kombelewa yaNgoloneya eshi oshikando shotete kwa li inava nyamukulwa. Ova shangela ombapila kouministeli wexumokomesho leedoolopa noitukulwa yokomikunda, oshoyo komalelo omifyuululwakalo oko nako koko a fila ashike omututu.
Tava ti omolwa oku he lipula nasho nomanyenyeto oshiwana, nena ope na omatopoko manene mokati koshiwana moitukulwa aishe yOukwanyama, omayalafano pokati komadimo okwa hapupala, omalwoodi momikunda okwa xwama, okuha landula eenghedimango okwa duka, oku nangeka oovene vomikunda ve dulife pu umwe okwa duka, oku likufila edu noku nyeka ko edu loshiwana pehe li paveta osha ninga oshinima sha keshe efiku novakwashiwana ova lukwa elebele kelelo lOukwanyama molwa oufemba wavo.
Momukanda wavo otava popi kutya ova ninga omakonakono omoule, nova kumwa koshidjemo osho va mona kutya Ohamba Meekulu Martha Mwadinomho Christian yaNelumbu okwa tenekwapo ashike mboli vati ke shi womepata leehamba. Sho osho she va pa va diladile kutya ounghundi wewiliko oshidjemo shoku etwa mepata leehamba. Otava ti omolwa okutenekwa mepata leehamba, nena ove wete kutya Meekulu ina wana okulela, okuhanganifa oshiwana shOvakwanyama, nena ova pumbwa ohamba imwe.
Otava pula Meekulu Martha Mwadinomho Christian Nelumbu pamwe nomalenga aye a kula ngaashi; George Nelulu, Urias Ndilula, Efraim Weyulu, Toivo Shiweda, Linda Mwaetako, Samuel Mwaetako naElias Waandja va kale va fiya po ouhamba oshoyo oulenga meni lomafiku 30 konima eshi omukandanyenyeto ou wa leshwa.
Otava ti ova kanifa omukumo neinekelo mewiliko lopaife lOukwanyama notava ti itava ka longela kumwe nalo manga omanyenyeto avo inaa nyamukulwa.
Omukanda nyenyeto owa tambulwa ko kuNgoloneya wOhangwena Usko Nghaamwa nokwa udaneka kutya ote u twala keembelewa nokomalelo oku wa pumbiwa.