OKAPUKU- Yina yokanona okamati koomvula 17 hoka ta ka lumbu nuulema okwa okwa halulwa noonkondo oshoka okamwana anuwa taka hepekwa kaalongi yamwe posikola Oshifukwa Combined School ndjoka yi li moshikandjohogololo Omuthiya moshitopolwa shaShikoto. 

Onkalo ndjika oya eta opo Henock Mvula (17) a thige po osikola manga pakathimbo. Simsolia Hosea, yina yaMvula okwa ti okwa kumwa sho okamwana ke mu lombwele kutya kake na we ohokwe yokuya kosikola oshoka ohaka hepekwa kaalongi.

Mvula ngoka a valwa nuunkundi kokwaako kokolulyo, okugulu osho wo uunkundi wokupopya okwa lombwele omutoolinkundana nguka kutya nonando a hala okumana eilongo lye opo a ka kale omupangeli, okwa hala okufudha po manga okuya kenongelo oshoka okwa li a dhengwa, a thangwa nokuundagulwa komulongisikola edhina lye lya lombwelwa Kundana. Ta ti oshikando shotango opethimbo a li mondondo ontitano sho anuwa omulongi ngoka a li e mu lundile kutya oha yaka mo iikulya yaalongwa aakwawo moondjato, ta ti shika osha piyaganeka omadhgilaadhilo ge.

“Ihandi gumu iinima yaantu na kandi na oonkondo dhokulonga iilonga mbyoka. Ondi shi kutya kandi na oonkondo dhoku igamena,” ta popi ngaaka neyeme.
Lutiyali nomulongi oye tuu ngoka ihee ya longo, okwe mu adha ta ende pamwe naalongwa ooyakwawo nokwe ya lombwele ya ye kongulu. 

“Aalongwa aakwetu oya matuka ya thinda mongulu oshoka otaya vulu omanga ngame nda li tandi endelele oshoka itandi vulu okumatuka molwonkalo yandje. Okwa li a thanga ndje komatako nongaku yotyokola... Okwa undula ndje nonda gwile pevi. Ookuume kandje oya kutha ndje po, nomulongi ngoka okwa tsikile nokudhenga ndje momutse sigo nda lili,” ta fatulula ngaaka.

Ta ti sigo okeluwa ndika ke shi kutya omolwashike omulongi ngoka he mu dhenge. Ta fatulula komeho gayina kutya ookuume ke oya li ye mu kumagidha a ye kombelewa yomukuluntusikola.
“Sho nda yi kombelewa yomukuluntusikola onda li nda hala a fale ndje koshipangelo oshoka onda li tandi ehama olutu aluhe ashike inandi mona ekwatho lyasha. Onda li ashike nda falwa koshipangelo komulongi gumwe ngoka omushiwikile kaavali yandje,” ta gwedha po. Hosea ta ti okuza mpoka okamwana okali ka kanitha ombinzi noka ka tulwa ombinzi koshipangelo. Omukuluntusikola John Mulundu okwa ti kutya oshiningwanima shika oku shi shi, ta ti okwa li a tumu omulongi nguka a ka gandje ombili kegumbo. Ta tsikile kutya anuwa omunona nguka ina dhengwa ihe okwa undulwa ashike.

“Sho omulongi e ya, okwa ti okwa tumwa komukuluntusikola a ka gandje ombili. Ombili otwe yi taamba. Okwa pula ngele ota vulu okufutila po oshimaliwa shoka twa longitha moshipangelo. Shika onde shi tindi oshoka shoka a longa kandi wete sha wapa okufutwa noshimaliwa,” Hosea ta fatulula ngaaka.

Ta ti okwa kala a tegelela osikola yi ye kuye ya opo ya kundathane oshinima shika, ashike kape na ngoka e ya ko. Ofamili oya tokola okufala shi fala kUuministeli wUukashikekookantu nOnkalonawa Yaanona. Nakuvala ta ti onkalo oya nayipala oshoka omulongi ishewe gulwe gomulumentu edhina lye lya lombwelwa Kundana, naye ha longo kosikola oko tuu hoka okwa li a ponokele Mvula sho a ndopa otutsu.
Anuwa omulongi ngoka okwa li a pe aalongwa egeelo mboka ya ndopa otutsu, ya ka lime omwiidhi molugumbo lwosikola, mpoka Mvula okwa li a gandja ethaneko kutya ye na pewe a halake omwiidhi oshoka ita vulu okulonga netemo. Omulongi aniwa okwa ponokele Mvula nomalaka omawinayi.
Omunambelewa kuuministeli wuukashike kookantu okwa ti omakonaakono moshipotha shika oge li metifa. 

Kansela gwOmuthiya Samuel Shivute okwa lombwele Kundana kutya aalongisikola naya tale koonkalo dhaanaskola, nokuyayambidhidha ndele haku ya ponokela.