Okanona komimvo hamano oka si, omanga omukulupe gwomimvo 60 osho wo okakadhona komimvo 17 ya monithwa oshiponga, sho ya hahalwa nomakatana komulumentu gwopomukunda gwawo.
Oshiningwanima shika osha ningilwa momukunda Epanya, moshitukulwa shEndola uusiku wEtiyali.
Omupopiliko gwopolisi moshitopolwa shaShana Thomas Aiyambo okwa ti, oshiningwanima shoka osha holoka lwopotundi 20h00 yokongulohi momudhingoloko Ohailulu mEndola, moshitopolwa shaShana.

“Otaku hokololwa kutya omulumentu ngoka okwa li a  ponekela aanegumbo mboka nokuyahahala nomakatana. Oya li ya falwa koshipangelo, omanga okanona komimvo hamano ka  hulithile mondjila,” Aiyambo ta ti ngaaka.
Omukulupe nokakadhona otaku hokololwa ye li monkalo yi li hwepo moshipangelo. 
Omulumentu ngoka okwa mangwa po kopolisi, naashoka sha etitha oshiningwanima shoka shi nyanyaleka inashi tseyika natango.
Kape na uuyelele wa gwana ngele omulumentu ngoka okwa pambathana nayo.
Omakonaakono gopolisi oge li metifa.