Onanke- Aakwashigwana yOmonanke ngashingeyi otaya lala ngaa nee taya mbonyoka shaashi ondhalate yEtosha ndjoka ya lumbu ya mbwalangasha pu na sha ngashingeyi oya tulwa po noyi li pomuthika gwopashinanena.

Oshituthi sheegululo pambelewa lyokutula ko ondhalate koshitopolwa shEtosha  osha li sha patululwa mOlyomakaya goshiwike sha zi ko kominista yomudhingoloko nomalweendotalelopo Pohamba Shifeta nomupeviminista gwe pomukunda ogwo tuu ngoka.

Aakwashigwana oya li ya holoka nomwaalu ogundji ngoka tagu hokitha notagu ulike kutya shika osho etumba kaakwashoka sha ningwa po noya nyanyukwa noonkondo adhihe.
Gumwe gwomaakwashigwana mboka ya li ya ende oshituthi shoka okwa ti kutya pethimbo ndyoka pwa kala kapu na ondhalate ndjoka iiyamakuti ngaashi uuhandje, oonkoshi, oompanda noshowo oondjamba oya kala taya pingathana nadho unene.

“Ngashiingeyi otwa pandula sho twa tulilwa po ondhalate ndjoka oshoka otwa kala nokukanitha iimuna yetu kiiyamakuti, nonande uuministeli owa kala hawu tu pe okashona hoka ye na po,”   omukwashigwana a hokolola ngaaka.

Yamwe woo yomaakwashigwana mboka oya hokolola kutya oya kala ye li monkalo ya mbandapala molwiiyamakuti ihe ngashingeyi oya nyanyukwa nookondo adhihe kutya ondhalate otayi ningwa nawa.
Ashike Shifeta okwa popi kutya kutya olugumbo lwodhalate yokashana kedhina Etosha National Park otayi pewa esimano miinyangadhalwa mbyoka yi na okulongwa nuumvo.

Okwa popi kutya opoloyeka oyo tuu ndjoka otayi langekwa momasiku 22 gaFebuluali nuumvo moka aaniilonga yomEtosha yo yene oyo taya ka longa po iilonga mbyoka yoyene tashi pitile mokwiiyamba.
 Okwa ti uuministeli otawu ka kala woo wi ipyakidhila unene okukala wa longulula oondjila ndhoka hadhi longithwa kaataleli po yomEtosha.

“Shika otatu shi ningi mokukala twa sa oshimpwiyu kutya aatalelipo noshowo aayenda yetu yomEtosha oye li ye uvite uugumbo nuuntsa ngele taya taalele po,” osho a hokolola ngaaka pethimbo ali ta popitha aanambelwa yomuuministeli moka lwotango nuumvo moshilandopangelo mEtitatu lyoshiwike shika.
Okwa ti kutya kakele kwaashoka sha popiwa pombanda uuministeli owu li komalwilo mokukala woo ya langeka opolohalama yilwe yedhina Friends of Parks Programme muule wethimbo efupi lela.

Okwa ti ndjoka oyo opolohalama ndjoka tayi ka tsa aayambidhidhi, omahangano gwopaumwene noshowo aayambidhidhi yomudhingoloko ngoka omukumo nokuyambidhidha ehumokomesho  lyuushana wiinamwenyo ya gamenwa moshilongo.