Shagwedhwa kombwena osha thika tuu shili, omukithi ngoka gwoocoronavirus ogwa thika moNamibia ngashiingeyi. Omukithi nguka otagu taandele tagu endelele muuyuni, unene tuu moEurope, ndjoka ngashiingeyi oyo tayi dhengwa unene. Niiponga iyali ya lopotwa moNamibia, aakalimo oyendji oye na uumbanda nomapulo ngele iipangelo yetu otayi vulu tuu okukwathela omukithi nguka kaagu taandele. Sho iiponga mbika iyali ya li ya lopotwa mehuliloshiwike, meendelelo lyakaimbi ta yakula ondjuhwa aaleli yetu oya li ya tula po omilandu, mwa kwatelwa okukaleka etyapulo lyesiku lyemanguluko lyoshilongo pangungo, osho wo okugongala kumwe komangungo.

Nonando ongawo, oonkammbadhala ndhoka dha tulwa po kepangelo lyapresidente Hage Geingob opo ya kondeke omukithi nguka odha topola aantu sho kehe gumwe e na omaiyuvo ge, noyendji otaya ulikathana omitanganwe omanga omukithi tagu pula komeho pwaa na uudhigu.

Namibia na thengwe kombunda sho a kutha omatokolo ge na omongo opo ku kambadhalwe ku yiwe etaandelo ndika moshipala. Ngashiingeyi kali shi ethimbo lyoku iyulika noku italela kombanda yoonyala, okupolitika oshinima shika nokuumba omatukano ashike oshilongo osha pumbwa okuhangana opo ku keelelwe omukithi. Iilongop mbyoka yi na iikwa niipangitho yuuhaku iihwepo oya mona omaso taga londo. Ohela sho oshifo shika sha li shu uka kokunyanyangidhwa, oshishiindalongo South Africa osha lopota nale iiponga 51. Iiponga oyindji oyi li muumbugantu waAfrica, unene moEgypt, Morocco naAlgeria moka mwa lopotwa wo omaso.

Onga oshilongo, natu yandeni okuhwameka engwangawano tse natu ningeni omatokolo ga kola. Sho osho etokolo lyapresidente Geingob mOlyomakaya lyi shi okupandulwa. Okukaleka metyapulo lyesiku lyemanguluko otashi ulike kutya ope na omuleli pokuma.

Omukithi nguka kagu li we posheelo, ashike ogwa thika meni lyoshilongo shetu noonkondo adhihe odha pumbwa oku ukithwa kokukonga okukandula po omukithi nguka, osho wo okuyambidhidha aapangi, oondohotola naaniilonga yalwe yuuhaku mboka ye li komeho gokukambadhala okusinda omukithi nguka.
Otwa tegelela wo oshikondo shiilonga yopaumwne shi dhane onkandangala moshinima shika opo shi gamene oshilongo. Shahugunina osho shika kutya otu na etimaumbwile kutya epangelo otali ka gandja uuyelele woshili moshigwana opo ku gundjilikwe omalimbililo.