Maurice Kambukwe

Oliga ndjoka ya kala ya tegelelwa koyendji yo-MTC Premier League yokatanga komokambamba, ndjoka ya li ya tseyithwa kongongahangano yokaytanga komokambamba yoNetball Namibia (NN), okwa tegelelwa yi ka tameke muMaalitsa omvula tayi ya. Ta popi noshikundaneki shoNew Era ohela, presidente gwo-NN Rebecca Goagoses okwa ti kutya oya thaneka ya ka tameke noliga muMaalitsa omumvu tu uka, oshoka okutameka ngashiingeyi itashi wapa manga omolwa etaandelo lyomukithi gwoCovid-19 ndyoka lyu uka pombanda, osho wo ethimbo ndyoka ngashiingeyi lya ya. Shi ikwatelela kuGoagoses, oliga ndjika yopremier league oyo yotango moshilongo notayi ka kala noosipana 12, hamano dhomoosipana ndhoka odha za miitopolwa yaKhomas, Erongo nOtjozondjupa, omanga hamano tadhi ka za kiitopolwa iikwawo 11 moshilongo.

Goagoses ta gwedha ko kutya NN ota ka kala noshigongi oshinene shokomvula muSepetemba, moka taya ka tula iinima ayihe pomahala.
“Otwa thaneka okutameka oliga omvula tayi ya, ngiika MuMaalitsa 2021. Oliga otayi ka kala noosipana 12 moka oosipana hamano dha mona mo nale omahala gadho. Oosipana ndhika odha za miitopolwa mbyoka ya kala nokudhana onetball; Khomas, Erongo nOtjozondjupa, iitopolwa mbika oya li ya manitha ooliga dhawo dhomiitopolwa omvula ya za ko notwa tokola tu hogolole ooosipana mbali dhopetameko momusholondondo ngoka kehe moshitopolwa, go omahala ge li gahamano otaga ka kuthwa po koosipana oonkwawo dhokiitopolwa yilwe.

Goagoses ta ti otaya ka inika komilungu mbali naaunganeki yokiitopolwa yilwe opo ya tule po elandulathano nondjila yu ukilila.
“Otwa hala wo okukala naahikihiya ye li pamuthika, osha simana kutse okukundathana aakuthimbinga ayehe manga oliga inaayi tameka,” ta gwedha ko ngaaka. NN oya li ya mono oshimaliwa shekwashilipaleko sha za kehangano lyoongodhi lyo-MTC shoomiliona N$4,2 uule woomvula ndatu komeho.