Victoria Kaapanda

ONGWEDIVA -Olutu lwomulumentu gwomimvo 29, olwa adhika momeya konima yomasiku gane lwooola momukunda Olukulo moshitopolwa shaMusati.

Omupopiliko gwopolisi moshitolwa moka Anna Kunga okwa ti oshiningwanima osha holoka pokati komasiku, 28 Febuluali sigo 03 gaMalitsa mehululoshiwike momudhingoloko gwOgongo.

“Otaku hokololwa kutya omulumentu ngoka okwa li a laleke kuume ke, ta ti ota ka tala ongodhi ye kuukamba wopomukunda gwawo tawu ithanwa Katutura mEtitano ndyoka ethimbo lyomutenya,” Kunga ta ti ngaaka.
Olutu olwa li lwa adhika kombanda yomeya mokandombe ke li popepi nondjila ndjoka hayi endwa okuya kuukamba hoka kwa li a ka tala ongodhi ye.

Okwa tongololwa onga Alfeus Inodhimwa Onesmus na kape na ngoka ta fekelelwa eso ndyoka.
 Aakwanezimo ye oya tseyithilwa nomakonakono gwopolisi oge li metifa.  
Opolisi moshitopolwa shaMusati otayi tsikile nokukumagidha aantu yomalovu ya ikaleke kokule nomaluvu ethimbo ndika lyomeya ogendjigendji, oshoka ngele taya ka taguluka momilonga otaya vulika oonkondo komeya.