Lasarus Hakwaake
EENHANA – Erastus Uutoni Ominista yOmaudano, Ovanyasha nOmayakulo Oshiwana okwa patulula omaudano okodula omatine oitukulwa aishe moshilongo. Omaudano aa ohaa eta kumwe oitukulwa aishe omulongo nainhe yoshilongo mwa kwatelwa Ouministeli Woilando oshoyo exumifokomesho lokomikunda. Elalakano lomaudano aa olo okukalekapo onghalonawa yovanailonga vomepangelo, ookamusela voikandjohololo oshoyo oogoloneya voitukulwa.
Moshipopiwa shaye Minisita okwa pula oitukulwa yoilonga i diladile okuninga omaudano oshitopolwa shoilonga. Okwa ti omaudona oo oshinima shinene ngeenge tashi uya pakunyamukula omikundu dopanghalafano ngaashi okuhe na oilonga mokati kovanyasha.
Okwa twikila kutya omaudano kae shi ashike enyamukulo koundjolowele wolutu ashike ota longekida ovanyasha vomapupi aeshe noku va pa omhito yoilonga paku danena oshilongo oshoyo esipaana dopondje yoshilongo osho tashi va etele oyuuyemo. Omaudano ohaa eta ovanhu kumwe opo va shiivafane nova tukulilafane ondungediladila yokuxumifa komesho oshilongo, omaudano oo ngoo nao a talika ko kutya ohaa kandula po oukwamuhoko shaashi ohaa hanganifa ovanhu aveshe. Okwa ti omaudano inaa talika vali ngaashi oshinina sha wedwa po ndele nashi ninge omumbwe yovanailonga. Okwa ti oku li a mbekulwa kotema yomaudano oyo tai ti “Oku nawapeka elikolo okudja momaudano”sho osho ta ti oku udite ombili shaashi omadeulo olutu osho shitopolwa sha fimana monghalamwenyo yomunhu.
Uutoni okwa indila oitukulwa aishe moshilongo i yambidide ye lipakamo mexumifokomesho lomaudano oshoyo okutunga oupale vomaudano moitukulwa yavo. Okwa pula yoo omalelo eedoolopa nao a vatele mokutunga oupale vomaudano.
Okwa popya nokutya ouministeli womaudano otau longo wa tula ombuda moshixwa okukwashilipaleka kutya keshe moshitukulwa omu na omaludi a hapu omaudano, meni lefimbo lixupi moitukulwa otamu ka kala ovadeuli ovo tava ka kwatela komesho omaudano a yooloka moitukulwa aishe 14 yoshilongo. Konima yoshipowa Minisita okwa ninga ehoololo laaku taku ka ningilwa omaudano mo2020, noshitukulwa shOmusati osho sha yaukamo oku ka idilila ovaenda. Omaudano aa okwa tameka mo 09 Septemba notaa xulu nena, 13 Septemba 2019 omo oitukula ei ye shi endifa nawa tai ka pewa omapapa.
Omaudano aa okwa hovelele mo2016 moKhomas, taa i koZambezi mo2017, nodula ya djako 2018 owa li koMaheke nodula ei oshitukulwa Ohangwena osho sha idilila ovaenda.