OMUTHIYA - Omauliko giipindi gokomumvo, ano Omuthiya Youth Fair and Trade Expo oga kalekwa komunute gwahugunina oshoka kaape na oshimaliwa. 

Omauliko ngano ohaga ningwa omumvo kehe onga omauliko giipindi gaagundjuka nedhina Omuthiya Youth Parliament (OYP), ehangano lyaaheshi lyopashimaliwa ndyoka lyi lile po uukalinawa waagundjuka.
Nkene lya totelwe mo2017, ehangano ndika olya kala tali nana nondatu ngele oshe ya pomauliko giipindi omolwa iinima yomoondjato, naantu momudhingonoko oya kala ya simaneka omauliko ngono oshoka oga kala taga yi komeho nonande otaga ningwa pe na uudhigu woshimaliwa.  

Omutotipo gwoOYP David Uusiku okwa ti otaya longitha ethimbo ndika lya lyi li na okuningwa omauliko ngoka ga ndopa onga ethimbo lyokugongela oshimaliwa shomauliko gomumvo tagu ya. 

“Oku na owala omwedhi gumwe, inatu gongela po oshimaliwa nonando twa ninga omaindilo kaasihenda oyendji. Onkene, onga ehangano otwa tokola owala opo tu undulile oshinima shika komvula tayi ya opo tu ipe ompito yokugongela po sha. Esiku lyiipindi ya landula ko otali ka tseyithwa nale momukokomoko gwomvula,” Uusiku ta fatulula. “Ondi wete kutya aantu mboka ya kala noku tu yambidhidha oya uvithwa nayi sho kaape na omakwatho ga gwana,” ta gwedha po, ye ta lombwele oshigwana kutya oku ukitha oshituthi komeho itashi ti kashi po we.  

Aawuliki yiipindi ye vulithe po150 oya li ya kutha ombinga mo-OYP omvula ya zi ko, sho oshituthi sha li sha ningwa oshikando oshitiyali. Shika osha li sha talika ko onga elunduluko enene okuyelakanitha naakuthimbing 50 yomo2017.