Victoria Kaapanda

ONGWEDIVA-Omawuliko giipindi ngoka ga li ga ningwa oshikando oshi-20 nuumvo oga li ga ende nawa, nonando oshilongo osha taalela onkalo ombwiinayi yoshimaliwa.

Omukuluntu gwomakwatathano mombelewa yElelo lyOndoolopa yaNgwediva Jackson Muma okwa li a yelithile iikundaneki ta ti mboka ya li ya kutha ombinga momawuliko giipindi nuumvo oya li oyendji ye vulithe yomvula ya zi ko.

“Otatu pandula mboka ya li ya yambidhidha omawuliko giipindi ngaka opo ga ye komeho. Shoka osha li sha holoka medhina lyeni, ano tsikileni natango nokulonga uuwanawa,” Muma ta ti ngaaka.Muma ta ti oku shi okupandula omuyambidhidhi gwawo omunene oshowo FNB, Standard Bank, NBC, Indongo Ford, Nored naNedbank.

Ta gwedha po ta ti nuumvo mboka ya kutha ombinga oya li ya gwedha ko komwaalu noopelesenda 15%, shoka tashi ulike etaandelo lyoshimaliwa moshilongo.

Omawuliko giipindi ohaga ngushupaleke wo omuthigululwakalo, unene ngele tashi ya kombinga yiilandithomwa yopamuthugululwakalo ngaashi iikulya, iikutu, niihongomwa unene oongeshefa ooshona.  Ndilimani Pottery okwa li a sindana omushingithi dhingi niilandithomwa yopamuthigululwakalo omanga Indongo Toyota Ongwediva a li a sindana omushingidhingi  kiikwahauto oshowo momawuliko giipindi agehe.

Muma ta ti nonando omwaalu gwaatalelipo nuamvo gwa shuna pevi okuza po84 858 omvula ya zi ko okuya po75 660 nuumvo, aashingithi oya li ya nyanyukwa natango oshoka kaya li ya tegelela natango omwaalu gu thike mpoka molwa egwopevi lyoshimaliwa moshilongo.Omukalimo gwomoshitopolwa shaMusati mEpalela Theophelus Shapwako okwa li a yi kegumbo noshipatululo shohauto ye yo Ford Figo, ndjoka a li a sindana methigathano kwa li lya ningwa kehangano lyoohauto Indongo Ford .