WINDHOEK-Omukulunhu wehangano loNamibia Qualification Authority (NQA) Franz Gertze okwa holoka onghela momhangulilo yaMangestalata moWindhoek, ta tamekelwa onghendabala yedipao, ya kwatakanifwa kumwe nokatendo kehepeko lomomaumbo. 

Gertze okwa li a kwatwa po keengula dOlomakaya molwaashi vati a yasha omukulukadi waye Anita Gertze (29) oo ve na naye ounona vavali vanini, lwoikando ihamano nondjebo hai longifwa moukongo yo7.7mm. Oshiningwanima eshi, osha ningilwa meumbo lavo li li mepandavanda laSchepman, moPioneers Park, moWindhoek.

Eshi a holoka momhangu, omweeti woihokolola wepangelo Rowan van Wyk Prevalent, okwa ti, Gertze (55) ina pewa nande e lifutile mo shaashi oiningwanima yomahepekafano omomaumbo oya londa pombada neenghono moshilongo, shoo kashi li mouwa woshiwana, vali ota dulu a piyaaneke omakonaakono opolifi, ile a faduke po. Van Wyk ta ti epangelo inali ningila natango oshihakanwa omapulaapulo, onghee Gertze na kale modolongo fiyo efimbo leemhangu tali fiki. 

Ashike omukalelipo waGertze wopaveta Trevor Brokerhoff, okwa ti otava ka ninga eindilo lopaveta opo omukalelwapo waye a pewe a lifutile mo. 

Pefimbo lomhangu, Gertze oo a li a kwatelwa meembete mOlomakaya, okwa li a mangwa kokwooko oko taku monika kwa mona oshiponga.  

Kakele kondjebo oyo ya hangwa meumbo, otaku hokololwa opolifi ye litwa yo mondjebo yombistoli, i na oikuti i li motuwa yaye. Eendjebo adishe mbali, odi li kedina laGertze. Eshi meumbo laye mwa hadwa, opolifi oye li twa yoo mokambapila taku fekelwa kutya oka nyolwa kuGertze, ta popi kutya ote lidipaa, note lidipaele shike.

Ashike, ye mwene eshi a twala omukadi koshipangelo, okwa ti okwe mu yasha pamupya, shaashi a li ta dilaadila kutya ope na eembudi de liteela meumbo eshi a uda omunhu ta ende. Ta ti okwa tameka okuumba naashi osha eta opo a yashe omukadi. 

Opolifi ina i mona edidiliko kutya eumbo lavo ola teywa.
Oshibofa shaye eshi a holoka momhangu, Gertze ka li a pewa omhito yoku lifutila mo, noshibofa shaye osha undulilwa komafiku 20 Febuluali 2020.