Omukiintu gwomimvo 34 okwa li anuwa a kwatwa koonkondo komugandji gwe gwiilonga gwomimvo 68 moKarasburg mOlyomakaya. Omukwatakanithi gwomakonaakono giimbuluma mopolisi yaNamibia moshitopolwa sha//Kharas, mopeviikomufala Nikodemus Mbango, okwa lombwele oshikundaneki shoNampa kutya ekwatokoonkondo ndika olya li lya holoka anuwa pokati kotundi 09h00 no10h00 pehala lyokugondja nokulala mondoolopa ndjoka yomuumbugantu woshilongo.

Otaku hokololwa anuwa omufekelwa a li a heke omukiintu ngoka a ye muyimwe yomoondunda sho anuwa e mu lombwele kutya oyi na uupyakadhi womeya. Sho omukiintu a yi mondunda, okwe mu landulile mo noku pata po pomweelo.

“Okwa li a kutha mo iikuntu yoshihakanwa koonkondo, noku mu kondjithila miihulo nando kakwa li a hala. 

Okwa li e mu pe N$300 konima,” Mbango ta ti ngaaka.

Ta gwedha po kutya pethimbo lyomakonaakono gopetameko, opolisi oya li ya tseyithilwa kutya opwa pita konyala iiwike iyali, omugandji gwiilonga ngoka natango okwa li a yi mokandjugo mu na omukiintu ngoka nokukala te mu pampadhala shaa li pahalo nopapitikilo lye. Omufekelwa okwa tegelelwa a ka holoke mompangu yaMangestalalata yaKarasburg, nomakonaakono gopolisi otaga tsikile. -Nampa