WINDHOEK – Omukiintu ngoka a li a mangwa po konyala oomwedhi ndatu dha pita po sho a hahala kuume ke kopaihulo ngoka ya li ya otekathana sigo okeluwa ndika ke na omukalelipo gwopaveta. Omutamanekwa, Dominica Mweengere Hamunyela, 32, okwa li a holoka mompangu yaMangestrata yaKatutura ohela kee na ohahende. Hamunyela okwa li a lombwelwa kompangu kutya oshi li muuwanawa we a konge omukalelipo gwopaveta oshoka oshipotha shoka a taalela oshinene. Hamunyela okwa lombwela ompangu kutya okwa ninga eindilo a pewe ohahende yepangelo. Hamunyela okwa tulilwa mo oshipotha shedhipago tashi talika pamwe nokatendo komahepekathano gomomagumbo.

Oshipotha osha za moshiningwanima shi nyanyaleka  shoka sha li sha ningilwa mombashu yawo moWindhoek, molukanda lwOkahandja Park muusiku womasiku 14 Mai nuumvo. Ta tamanekelwa kutya okwa tsu Mathias Mukonda Ntjamba, 32,  nombele, shoka inaashi mu thiga nomwenyo.
Otaku popiwa kutya Hamunyela okwa longitha ombele yomokombitha nokutsa Ntjamba lumwe montulo, ashike ye ota ti anuwa okwa longitha ofoloko. Otaku popiwa kutya aaholathani mbaka yaali oya li taya nyenyeta manga nguka inaa tsa mukwawo. Ta ku tiwa Hamunyela okwa tsile Ntjamba kombete noku mu undulila pevi mpoka a adhika.

Shi ikwatelela kaapambele mboka haya zi molugumbo lumwe naambaka, oya ti mbaka yaali oya kala ye na ekwatathano tali tengaatenga moka oondjuma dha kala dha kehe esiku, nuuna ya kondjo Hamunyela aluhe oha vulu Ntjamba oonkondo. Aapambele taya ti Hamunyela okwa li a nkapa Ntjamba nekatana iikando ine omathimbo ga piti. Hamunyela okwa li a adhika mombashu kaakawanezimo e na oombizi komagulu nokoompadhi. Onga oshizemo, Hamunyela okwa li a dhitikwa po kopolisi nokwa kala mokakuma sho a li a tindilwa ombooloha oshoka omakonaakono goshipotha she natango oge li petameko lela. Okwa tegelelwa a ka galukile mompangu momasiku 20 Septemba.