Malakia Nashongo

OSHAKATI - Ominista yotete Saara Kuugongelwa-Amadhila okwa talela po oshitukulwa shaShana opo konaakone onghalo yoshikukuta moshitukulwa. 

Oshikandjohoololo Uuvudhiya osho shimwe shomwaayo ya mona oixuna koshikukuta naashi osha kala sha djuupaleka oulifilo momudingonoko oo.  

MUuvudhiya omonhele omo ovanafaalama vokoitukulwa ine yokonooli ngaashi Oshana, Oshikoto, Ohangwena anOmusati hava undwile nokulifa lifa oimuna yavo ngee oshitukulwa ina shi mona omeva. Ashike neudo Uuvudhiya nao ou li monghuo i na onghambe.

 Kuugongelwa-Amadhilia okwa talela po eeendama neenhele dukunwina oimuna dilili nakulili moshitukulwa omo.

Ashike eshi a ninga etalelepo laye, omupilima okwa ti paife oku udite ombili shaasha mongaha omeva ota a pombwa okudilila kondama yokOlushandja a yukifwa komatale okUuvidhiya kehangano lokuandjaneka omeva loNamwater. Eshi oshi li elandulafano lopakafimbo oku shilipaleka kutya oimuna oi na omeva. 
 “Epombo lomeva okudja kOlushandja okuyukifa kUuvudhiya oshili ekandulepo lomukundu lopakafimbo, nepangele olili po ta li konaakona kutya ekandulepo lomukunda ou tali kalelele ota li etwa po ngahelipi,” Kuugongelwa-Amadhila ta ti.

Omupilima okwa talela po yo okapopmba kokOondama Mbali oko haka mono omeva taa pombwa okudja kokanala kOshakati, natango tuu kuNamwater. Omeva oo haa i ketale lokUuvudhiya oo oha eende konyala eekilometa 135km mokanala. 

Okudja pUuvudhiya Kuugongelwa-Amadhila okwa ka talela po ondobe ya kula kuhena vali hai iifanwa Yinakulu Yomadhiya netale laOponona. Omatale aa shito ohaakala nomeva oule womudo aushe, ashike omolwa omuloka munini omido da ya, neudo okwa pwiinina filufilu, noinamwenyo paife oya fininikwa opo i ende eendjila dile omolwa enota.  Omupilima okwa talela po vali onhele yokulifila mIipopo natango moshikandjo shaUuvudhiya omo kansela a tula eetenga domeva ovanhu noinamwenyo.  

Malakia Nashongo omunambelewa wouyelele KOuministeli wOkuyandja Oouyelele nOmakwatafano Opaungoba, kombelewa yoshitukulwa shaShana mOShakati.