Obrein Simasiku

OMUTHIYA – Mu na nale okapale kokatanga kokoompadhi taka gwitha oyendji kiipundi, ondoolopa yOmuthiya masiku hamale otayi ka tunga uupale wokudhanena okatanga komokambamba, hoka ka tseyika nawa nedhina netball.
Mayola gwondoolopa ndjiika, Katrina Usiku okwa li a tseyitha omasiku ga zi ko kutya elelo lyondoolopa olyi ikalekela oshimaliwa shi thike pomiliona N$1 ndjoka tayi ka longithwa okutunga uupale wonetball  mondoolopa, ta ti shika otashi ka hwepopeka onkalo ywaana uupale womaudhano moshitopolwa.
Usiku ta gwedha po wo kutya natango ope na ethaneko opo ku tungwe uupale womaudhano  galwe ngaashi ovolleyball nobasketball, ta ti ashiike shoka otashi ka ningwa moomvula tahi ya.
“Moshikakomumvo shoshimaliwa sho2019/2020, elelo olyatula komeho  etungopo lyuupale  woetanga lyomokambamba wongushu opo ku thitikwe omwaka ngoka gu li  pokati kaamati naakadhona. Ngaashi twe shi tseyeni nale, Omuthiya ogu na nale okapale ketanga lyokoompadhi hoka ka li ka tungwa pakwathelo lyaFIFA naashoka osha hala kutya aaholimaudhano yaamati keye na uupyakadhi wokaa na iikwa niipangitho, onkene otwa hala okutala kaaholimaudhano mboka aakiintu.
Mayola ta gwedha ko ta ti elelo olyi ikalekela N$150 000 nyoka kwa dhiladhilwa shi ka longithwe mokultuyla ko ongandjo kokapale.