Victoria Kaapanda

ONGWEDIVA - Omulumentu gwomimvo 22, okwa ti manga inaa mona ompito yo kuya kosikola, kena esiku ase kondjala.
Thomas Kalipi okwa yambukile komukunda Onyaanya moshitopolwa shaShikoto, ihe okwa putukila molukanda Oneshila mOshakati. Kalipi ta ti okwa hulila mondondo 4. Elongo kali shi kuume ke, ashike shoka itashi mu sitha ondjala.
Omulumentu nguka okwa li a fuula aantu nokundaanisa kwe Olyomakaya ya zi ko pokamba tayi ithanwa Omutunda Gwambala mOneshila.
Kalipi omundaanisi gwoongalo dhoKwaito oshowo Kwasa-Kwasa ohi inyenge paunkulungu lela. Oha ende noradio ndjoka ha tyaatyele kolusheno nongele pehala mpoka kape na olusheno oha kala a humbata emanya lyomo radio.
“Okangalo kandje oke na  N$2 okupulakena ashike, nongele otandi ku ndaanisileko ohandi pula N$10, “ Kalipi ta popi ngaaka.
 Kalipi okwa tsikile ta ti, okundaanisa okwe ku tameke nale momumvo 2010 e ta tokola e shi ninge onkambadhalapindiko.
Ta ti oha mono iiyemo ya gwana okwiikwathela noompumbwe dha kehe esiku. Oshakati ohe yi mana ko esiku limwe, ta ti iha tokwa nando lwaali, kehe gumwe oha kala a hala oku mu tala ngele ta ndaanisa oshoka enyakwa mokundanisa lela.
“Onda kala handi zi nookuume kandje megumbo lyawo oshoka kandi na mpa he zi, ashike payife ondi na okapeleki kandje molukanda muka, ohandi futu ashike  N$ 200 yehala mpoka nda dhengela,” Kalipi ta ti ngaaka.
Kalipi okwa tseyika nedhina lyokundaanisa “Shimaliwa”, ta ti okwa iluka shimaliwa oshoka okushi oku shi longa.
Sho a pulwa kutya oha longo ingapi komwedhi, okwa ti ehuliloshiwike ndika owala lya piti okwa longele N$600 mokundaanisa pomahala gi ili nogi ili mOshakati.