Ondangwa - Aakalimo yomOndangwa yaShinime Shiivula niitopolwa ya yooloka noondoolopa dhopopepi oombwa dha kwata odheni sho tamu ka mwenyekwa komawuliko gaanyasha muule wehuliloshiwike lyaPaasa.

Aanyasha yomOndangwa oye li ya tula kumwe iinyangadhalwa, mbyoka tayi yambidhidha omapendulepo guungesefa uushona nomayinyanyudho.
Oshinyangadhalwa shika tashi ithanwa nedhina lyoshingolo Ondangwa Youth Expo oshi li tashi tameke ongula yanakwasha pomahala ga yooloka mOndangwa.

Ehala limwe okapale komawudhano koposekundosikola yaLuno nashimwe otashi ka ningilwa poshinyanga shaayehe shaLuno.

Omawudhano ga yooloka ngoka ga kwatelwa komeho kokatanga kokoompadhi otaga ka kala ogo taga ti pii momukokomoko gwehuliloshiwike.

Iilandithomwa ya yooloka otayi ka kala yi li kepaya mpeyaka, naandjika oyi li ompito onene yaanangesfa yopetameko opo ya ka ulike nokushingitha iilikolomwa niilandithomwa yawo.

Aahikingalo ya yooloka moshilongo otaya ka mwenyeka iinyangadhalwa yawo noongalo dhawo kaaku na we, ila wu tale D-Kandjafa, Filly-Zo, Bantu, Sharpshooters, Kapa kaMandela, Ndawana, Nally,Kaboy Loxinado, Ondangwa Signature Academy, K-Dio, JK Nakaye naNilton nosho tuu.

Ashike mOsoondaha oombwa otadhi ka dhengwa niiyaha sho Shapumba shAmutenya Exit yemwenemwene ta ka kwata ko ewangandjo nokumwenyeka mboka taya ka holoka poshinyanga shaLuno.
Ayihe mpeyaka pOndangwa oya longekidhwa oshoka otapu ka landithwa noshokutula poshindimba, dho nomiligu otadhi ka talalekwa.