Oshakati - Onakuyiwa yosipana yokatanga kokoompadhi yaNamibia Brave Warriors mekopi lyiigwana yaAfrica oyi li pokati komwele nolumpangwa konima sho Namibia a li a ndopa okusindana uudhano we womegumbo na Guiea Bissau olyomakaya gazako mOveduka.

Namibia naGuinea oya li yi ithigi othika 0-0 olyomakaya gazako, naashika osha li sha yumudha po ekondithathano lyiilongo mongundu ya K moka Zambia na Mozambique ya li yena uudhano osoondaha.

Oyendji oya li ye wete kutya oku dhana shithike pamwe kwa Namibia na Guinea okwa li ompito ombwaanawa ku Zambia, opo a ninge shitika shiye ye a ihilile kombanda yoshitaafula dhika odha li dha nakalindi, oshoka Zambia hwiya koMozambique okwa li a ziko ompadhi ketako oshoka okwa li a dhengwa mo 1-0.

Edhengo ndika olya li lya hulitha po olweendo lwaZambia ngoka wo a li enyakwa lyaafrica oshikando shimwe, oshoka edhengo olye mu thigi a kankama piitsa ine, na okuna ko ashike uudhano wumwe mboka nando ewu sindana ota ka mona ashike iitsa iheyali mbyoka ina yi gwana oshoka oosipana dhoka dhi li pombanda Namibia naGuinea oyena ayehe iitsa ihetatutu.

Mozambique oku li a yumudhapo ondjodhi ye yo ku ya kekopi lyiigwana yAfrica, ashike ondjila ye nayo oyina omandangalati oshoka okwa pumbwa a dhenge Guinea muudhano wawo wahugunina
opo a mone ompito ye yokuya koCameroon.

Ngele Mozambique okwa dhenge Guinea nena Namibia okwa pumbwa oku mona oshitsa koZambia opo ashike a yaleke olukalwa lwe mekopi ndika.

Namibia naGuinea oya pumbwa ashike oshitsa shimwe muudhano wawo wahugunina ashike oya taalelaolugodhi olululu oshoka Zambia ota ka kambadhala opo a yonene Namibia yo ya kale yafaathana onkene Namibia okuna oku ya koZambia a manga a pama ngele hasho ota kanikithwa uulayi.

Namibia okwa li a etha ompito yo ku dhengela Guinea megumbo onkene ota shiti okuna oku lwa a tula ombunda moshihwa opo ye kekopi lyiigwana yaAfrica.
Edhingoloko lyuudhano mbuka oli liko muMarch omvula tuuka.