Minista yomakwatathano gIinima yopondje noshowo omalongelokumwe Netumbo Nandi-Ndaitwah okwa koleke kutya opwa li pu na oshikumungu shokatongo moChina, shoka sha li sha tongola aakwashigwana yAfrika ashike ngashiingeyi osha tulwa po oshoka aaleli yaAfrika oya ya moonkundathana naChina e taya holola euvonayi lyawo.

Okwa ti kutya ngashingeyi onkalo oya shuna hoka ya li nale omanga okatongo ka li inaka tulwa miilonga oshiwike shika.
Ta hokolola kutya omuleli omunene ngoka a kalela po iigwana yahangana yaAfrika okwa li a hiya omupilima gwaChina kombelewa ye moAddis Ababa e taya kundathana oshikumungu shoka oshoka China na Afrika omapanga omanene. 
Aakwashigwana yaNamibia ye li yatano nayo oya kwatelwa mo maantu mboka ya konaakonwa omukithi gwoCovid-19 moshilongo shoka. 

“Aanamibia mboka yatatu yomuyo ohaya zi momuhandjo gwosikola, gumwe okwa li ha hiila mofuleta, omanga mukawo omunangeshefa ngoka a li ha zi mohotela. Ayehe mbaka oya tutsa nokukonaakonwa ombuto ndjoka noya ikalekelwa,” osho Ndaitwah a hokolola ngaaka.

Okwa ti ngashiingeyi ayehe mboka oya ikalekelwa uule womasiku ge li 14 opo ya tegelele ya ka tutswe ishewe.
Nandi-Ndaitwah okwa lombwele Aanamibia ayehe mboka ye li kondje yoshilongo ya ishangithe koombelewa dhaNamibia ndhoka dhi li kondje opo ya kale ye shiwike  yo ishiwe taya iyutha koompango noondjindikila ndhoka dha tulwa po kiilongo mbyoka oshoka ngashiingeyi kapu na oompito ndhoku etwa koshilongo huka.

“Ngashingeyi oompito adhihe okweenda odha patwa kutya oondjenda dhokoompadhi nenge dhomombanda. Onkene kapu na ompito yokuya kegumbo. Otatu indile aakwashigwana ya kale ashike hoka sigo onkalo tayi hwepopala,” osho a ti 
ngaaka.