Rome - Opolisi yaItaly melongelokumwe nopolisi yaSwitzerland oya manga po aafekelwa 75 moshikonga shoka shi li ompinge ‘noNdrangheta’, oomafia ndhoka hadhi longele muuzilo waItaly, noya kwata ko iinima yongushu yooEuro oomiliona 169. Oshikonga shika sha ningwa kiilongo mbika iyali osha li shi na aapolisi 700 kombinga yaItaly, osho opolisi yi na sha noshimaliwa moItaly ya ti ngaaka momushangwa gwa pitithwa ohela.
Aantu 75 oya li ya mangwa moItaly nomoSwitzerland, taya fekelelwa omiyonena niimbuluma ya kwatela mo okulonga onga oomafia, okulanditha omapangwe haga yi kiilongo niilongo, osho wo okulunga nokwiitapula,” osho opolisi yokugamena oshimaliwa yedhina Guardi di Finanza ya ti ngaaka.
Ombelewa yomupanguli gwaSwitzerland oya li ya ti mEtitatu kutya opolisi oya kwata ko iilwitho miikonga mbyoka ya li miitopolwa yaArgovia, Solothurn, Zug noTicino.
Aafekelwa yahamano yaItaly, oyendji aakalimo paife yomoSwitzerland, otaya fekelelwa iimbuluma mwa kwatelwa okufala iimaliwa yiifundja okuza moItaly.
“Aafekelwa mbaka oya kala moSwitzerland noya fa ya kala taya longo iilonga yaa li paveta pamwe nayilwe yi li paveta, ngaashi omikuli osho wo okukwatela komeho omahala gokulya,” osho omupanguli Omuswitzerland a ti ngaaka. Opolisi yaItaly otayi ti kutya aantu 158 oyo ya li ya taalelwa koshikonga shika.
“Ngele ope na ngoka ta dhilaadhila kutya ‘Ndrangheta uupyakadhi ashike waItaly, oshikonga shika osha ulika iizemo yilwe,” osho omukuluntu gwopolisi yi li ompinge noomafia moItaly, Nicola Morra a ti.
Interpol oya li ya kunkilile omwedhi gwa za ko kutya sho oomafia ndhika dhi na iimaliwa oyindji, nena otaya vulu oku ka kwathela oongeshefa ndhoka tadhi ka kala tadhi shongoloa konima yepato lyocoronavirus naashika otashi ke ya pa ompito onene yokuya meliko lyi li paveta.
Ongundu ndjika yoNdrangheta yi li moshitopolwa shaCalabria, oya pitilila ongundu noomafia ndjoka yomoSicily ndjoka ya tseyika nawa Cosa Nostra.
Oshikonga oshinene sha li sha ningwa muDesemba osha li sha kwata aantu ye li 334, mwa kwatelwa omukuluntu gwopoliisi noshilyo shimwe shomutumba gwopashigwana.
-Nampa/AFP