Johanna Aluteni 

OUTAPI - Aanegumbo yamwe momukunda Oshilulu moshitopolwa shaMusati, oya hupu mwaashoka sha li shi na okukala oshiponga oshinene sho ondjaba yi iteyele maandjawo manga ya li ya lala.

Otaku hokololwa ondjamba yondumentu yi iteyele megumbo lyaElago Elago ndjoka lyi li momudhingonoko gwaKahao mokati kuusiku, ashike elago enene inayi monitha nando omuthu gumwe oshiponga.
Ondjamba ndjoka anuwa oya li yimwe yomoondjamba heyali, ndhoka dhi iteyele momapya nokuhanagula po iikunomwa, ashike yimwe ashike ya ya meni lyegumbo. Oondjamba ondho tuu ndhoka odha yi ishewe mepya lyopuushiinda moka wo dha longo uushadha. 

 “Sho nda uvu omainyengo lwopo 02h00, tango onda li tandi dhilaadhila kutya oombwa ashike odha tameke okuza omawi, nonda dhimbulula kutya oondjamba. Onda li nda tila noonkondo, ashike onda penduka e tandi tameke oku pompola oshipeleki naashoka oshe dhi tilitha e tadhi yi,” gumwe gwomaakalimo, Hafeni Shikokola ta ti. 

Kansela gwoshikandjohogololo Okahao Leonard Shikulo okwa ti okwa yakula oongodhi kaakwashigwana yokomikunda  Oshilulu, Ombwata, nOnandjila, mboka taya pula ekwatho opo uuministeli womidhingoloko nuupashiyoni u kuthe mo oondjamba moshitopolwa shawo. 

“Aakwashigwana yomOshilulu, Ombwata nOnandjila oye na okukala ya kotoka nokuyanda oku enda uusiku omolwa oondjamba ndhoka dhi li moshitopolwa,” Shikulo ta ti. 

Hilda Namwenyo yaNathinge, omunambelewa koSheya Shuushona Conservancy mOkahao naye wo okwa kunkilila aakwashigwana ya kale ya kotoka, yo ishewe naya lopote mpoka taya mono iiyamakuti.
“Aakwashigwana ngele ya mono oondjamba, naya kale taya fike omapumba gadho ye ga vundakanitha nondungu, oluthi ohalu tidhile oondjamba kokule. Naya tete wo uupeleki e ta ye yu leke piiyelo yomankolo gwawo uusiku. Oondjamba ohadhi tila omutaimo gwiitenda.  

Oondjamba otaku fekelwa kutya otadhi zilile kombinga yokoshikunino shiinamwenyo kEtosha National Park, naakwashigwana yopomahala mpoka hapu thikwa koondjamba oya indilwa ya kale ya kotoka manga uuministeli tawu ya po nomukalo tagu kalele oku dhi kaleka kokule naantu.