Oondjayi dhiita noofamili dhawo odha indikwa okuya moUSA. Amushanga gwEpangelo Mike Pompeo okwa ti ope na uumbangi tawu inekelwa kutya oondjayi dhiita odha li dhi na mo olunyala medhipago nehepeko lyaadhinwantu yoludhi talu ithanwa Rohingya mo2017, nomahepeko ngoka onkene taga tsikile. Epangelo lyaMyanmar osho wo etanga lyopakwiita olya nyana oondjindikila ndhika.
Brigadier General Zaw Min Tun okwa lombwela Reuters kutya omakonaakono taga ningwa ketanga lyopakwiita kombinga yomakuyunguto gomo2017 oge li metifa. Ashike Pompeo okwa ti oondjindikila odha etwa unene sho kakukutu komatanga Min Aung Hlaing a li a kutha etokolo okumangulula aakwiita mboka ya li ya monika ondjo momadhipago giipundjamenye ngaka momukunda Inn Din mo2017. Oya kala konima yekumba ethimbo eshona okuyelekanitha naatoolinkundana yaReuters Wa Lone naKyaw Soe Oe, mboka ya kala nokukonaakona omadhipago ngaka. Aatoolinkundnana mbaka yaali oya kala konyala oomwedhi 16 konima yekumba noya li ya mangululwa momasiku 6 Mai. Aatoolinkundnana taya ti etanga lyegameno onkene tuu li na oonkondo moMyanmar, shoka sha tseyika wo nedhina Burma.
Pompeo ta ti: Otu na natango eikwatopomutima kutya epangelo lyaBurma inali kuthila natango onkantu mboka ya li ye na ondjo meyonagulo lyuuthemba womuntu osho wo omahepeko., nonkene pe na omahepeko taga popilwa etanga lyegameno lyaBurma.
Ta ti US oye oshilongo shotango sha li sha popi puuyelele okukuthila onkatu aanambelewa aakuluntu yetanga lyegameno lyaBurma.
Aarohingya ye vulithe po 700 000 oya tauka moMaynmar sho iikolokosha nomadhipago ngaka ga tamekele mo2017. Iigwanahangano oya hala aanambelewa yetanga lyegameno ya pangulwe. Epangelo lyaMyanmar tali ti etanga lyopakwiita olya li ashike lya ikanyuna omaponokelo ga ningwa kaatsindumbo nepangelo Aarohingya.
-BBC
