Obrein Simasiku

OMUTHIYA – Osikola yopaumwene moKatima Mulilo oya kaleka manga elongo lyoshipala noshipala sha landula sho gumwe gwomaalongwa yondondo onti-3 a lopotwa kutya okwa li mekwatathano nomuniilonga guuhaku ngoka a monika omukithi gwocoronavirus.
Momushangwapitithi ngoka gwa li gwa gandjwa mOmaandaha kosikola yedhina Mavuluma Adventist Primary Private School, gwa pitithwa komukuluntusikola George Nchindo, ogwa li gwa  tseyithile aavali kutya osikola otayi ka kaleka manga elongo lyoshipala noshipala uule womasiku 14 okutameka ohela, mEtitatu sigo omomasiku 04 Aguste. 
“Osikola oyi li moshiponga, ope na gumwe gomaalongwa tashi vulika a li mekwatathano nomuniilonga guuhaku ngoka a monika omukithi. Onkene omolwetompelo ndika tatu pula aavali ya kaleke aanona yawo megameno,” omukanda tagu ti ngaaka.
Ashike sho a li a ningwa naye ekwatathano, Nchindo okwa li a li moonyandi nokwa yakula ta ti: “Ihandi popi naantu kandi ya shi, kehe gumwe ota vulu okwiininga omutoolinkundana, ngoka a pumbwa uuyelele mbuka na thike koombelewa dhetu,” ta ti ngaaka.
Sigo oompaka, moshitopolwa shaZambezi omwa lopotwa aantu yatatu ye na omukithi gwoCovid-19.