Victoria Kaapanda
ONGWEDIVA-Opolisi mOmusati oya pititha pambelewa oprograma yokulwitha iimbuluma mOshitopolwa.
Omukuluntu gwopolisi moshitopolwa shaMusati Commissioner Titus Shikongo okwa ti elalakano lyokupititha oprograma ‘Turn Back Crime’ okushunitha pevi iimbuluma moshitopolwa.
“Oprograma ndjika yokulwitha iimbuluma okwa lalakanenwa yi kale miitoloplwa ayihe moshilongo, moka Oshana, Erongo, Otjozondjupa, Kavango, Zambezi oshowo Ohangwena ye yi pititha nale, niitopolwa mbyoka ya hupa ko oyi li metifa oku yi pititha,” Shikongo ta ti ngaaka.
Okwa popi ta ti Omupresidente omukulu Hifikepunye Pohamba momumvo 2015 okwa li a pititha oprograma yokulwitha iimbuluma mOshakati moshitopolwa shaShana, nelalakano lyokushunitha pevi iimbuluma hayi holoka kehe esiku miitopowa ayihe 14 moshilongo.
Ta gwedha po ta ti okulwitha iimbuluma itaku kondjithwa ashike moNamibia ihe nomiilongo oyindji momanenevi gaAsia, Europe, America oshowo iilongo oyindji yomuAfrika mbyoka ya tegelela oku ka pititha “Turn Back Crime”.
Namibia oshilongo oshititatu muAfrica okupititha oprograma yokulwitha iimbuluma konima yaTanzani naSouth Afrika, omanga iilongo iikwawo yomuAfrika inayi pititha oprograma ndjoka yo “Turn Back crime” natango.
Oprograma ndjoka oya li ya tototwapo koInternational Criminal Police “INTERPOL,” ehangano lyopolisi muuyuni ndyoka lya kalelwa po kilyo yi li 190 ya za kiilongo yi ili momumvo 2014, nelalakano lwokulwitha iimbuluma.
Ngele aakwashigwana ya uvithwa ko nkene ye na okulwitha iimbuluma miitopolwa yawo, nena otashi kala oshipu nokuyo yene oshoka oonkalamwenyo dhawo itadhi kala we moshiponga.
“Shino otashi ka kwathela oshigwana okuuva ko, nankene shi na okukala sha manguluka pomahala gawo, kutya opoongeshefa kape na omapiyagano nomawupyakadhi. Aakwashigwana oya indilwa opo ya longele kumwe nopolisi okulwitha iimbuluma nokulopota ayihe mbyoka ya puka notayi teyagula po oshigwana,” Shikongo osho a yelitha.
Okwa li a kumagidha ta ti kehe omukwashigwana oku na uuthemba okukutha ombinga moprograma ndjoka, okulwitha iimbuluma kashi shi ashike oshinakugwanitha shopolisi ayike, ihe oshigwana oshi na okulongela kumwe nopolisi opo iimbuluma yi sindike nokushuna pevi.