Oshiwana shovayelele moshikandjohoololo shaGuinas osha yambididwa noidjalomwa kukansela wavo Elias Martinus.
Oidjalomwa oya yandjwa Etivali pendiki lovayelele moshitukulwa shaShikoto.
Oikutu oyo oi li pongushu yoN$4000.
Kansela Martinus oye umwe a didilikwa e na olukeno noshiwana molwaashi oha yambidida ovanhu keemhumbwe dopaumwene.
Oshikandjohoololo Guinas osho shimwe sha didilikwa shi na omwaalu muhapu wOvasan tava dengwa koluhepo.
Martinus okwa ti okwa konga omakwafo moshiwana opo a dule okumona oshimaliwa shokulandela ovayelele oikutu.
“Paife otwa taalela efimbo loutalala. Oikutu otai kwafele oshiwana shiha dengwe koutalala,” ta ti.
Martinus okwa yelifa ta ti oshiwana shovayelele osha pumbwa omakwafo a yooloka ngaashi oikulya, oikumbafa nosho tuu.
“Ombelewa yange ohai kongo omakwafo a yooloka okuyambidida ovanhu ve li moluhepo shaashi oshi li oshinakuwanifa shange ongakansela,” ta ti.
Martinus okwa ti ota twikile okukonga omakwafo opo a dule okuyambidida oshiwana shaye.
Kansela okwa hokolola ta ti kombelewa yaye ohaku kala alushe ovanhu va ngudumana tava kwena ondjala.
“Omafimbo amwe ohandi longifa oshimaliwa sha dja mondjato yange okulandela oshiwana oikulya. Omafimbo amwe ohandi yandje oikulya tai di keumbo lange,” ta ti.
Okwa ti epangelo onghee tali twikile okuyambidida oshiwana noikulya ashike omafimbo amwe ihai kala ya wanena oshiwana.
Okwa indila ovanangeshefa, omahangano a yooloka noshoyo ovaleli vopapolitika va yambidide ombelewa nomakwafo a yooloka.
Kansela okwa kumaida oshiwana shoveyelele opo shiha longe oimbuluma, shihe li enge ngeenge shi li keendingosho nokomaumbo.
“Xulifei po okulongifa oshimaliwa sheni shopendjela moikolwifa. Oshimaliwa nashi longifwe okulanda oikulya neefewa,” osho a kumaida oshiwana.
Martinus okwa ti ombelewa yaye oye shi pondola okukala ya ninga omalongekido okukongela oshiwana shovayelele omaufemba oshilongo.
Omukulupe weedula 76 Simon Haulupe okwa ti paife ita dengwa vali koutalala shaashi okwa pewa eembidja doutala.
“Ohatu pandula kansela wetu molwaashi alushe oye te tu yambidida. Kala nomwenyo mule kansela wetu,” ta ti.
-fhamalwa@nepc.com.na