Pehala tali  ithanwa Katutura Community Hall otapu ka kala omakondombolo taga li ehete smEtitano(nena) sho aahikingalo taya ka mwenyeka poshiindingili shegongelo lyoshimaliwa. Ongundu yaahikingalo ndjoka ya tseyika nawa yedhina Matongo Family oya tokola okuya po noshikonga shi na sha nonkalonawa yuuntu nokuhumitha komeho onkalo yomoKatutura. Aamati mbaka oye li ya tula oombunda moshihwa sho ya tokola opo ya ka yambulepo osaala onenene nonkulu yaKatutura, ndjoka tayi ithanwa Katutura community Hall. Shika otaye ke shi ninga nokugongela oshimaliwa shooN$400 000. Oshimaliwa shika otashi ka kwathela moku opalekulula ehala ndika. Etungo ndika olya dhana onkandangala moonkalamwenyo dhaantu oyendji moKatutura, oshoka ohali longithwa pethimbo lyiigongi yopapolitika, ehala lyekonaakono lyuunona wosikola, oohango oshowo onga ehala lyomainyanyudho lyaagundjuka. Mr Makoya, ngaashi a tseyika nawa moongalo, okwa lombwele Kundana ta ti: “Otwe ya po nedhilaadhilo ndika lyokugandja nokushunitha sha moshigwana shoka sha kala noku tu yambidhidha uule woomvula 20. Otatu vulu ashike oku shi pondola nekwathelo lyaantu, noku ulukila wo uuyuni kutya montalelo moka ya talela Katutura oya penga, ano aantu moKatutura otaya vulu okuya pamwe e taya tyapula pamwe nombili.”  Aantu mboka itaaya vulu oku ka thika sho Matongo Family tayi ka mwenyeka  otaya vulu okugandja okashona kawo, nomahangano otaga indilwa wo ga lande uutekete yo ya pe aaniilonga yawo ya ka  yambidhidhe. Taya ti etungo ndika olya kala po ngashingeyi oomvula 54 nolya pumbwa okuthikama natango oomvula 50 komeho.
Oshiindingili shika otashi ka tameka potundi 18:00, negameno otalli ka kala lya kwata miiti.