Victoria Kaapanda

ONGWEDIVA – Omanga yamwe taya hambelele omvula ndjono ya loko nawa kuumbangalantu woshilongo, aanafaalama naanamapya yamwe  oya ikwata pomutima noye na omalimbililo kombinga yomvula.

Nathalia Kandume a za molukanda Oneshila okwa ti sho a tala omvula nuumvo otayi ka loka nawa, nompito yokuloka ya pitilila opo yi li, ndjoka hayi vulu oku etelela efundja.
“Ondi na uumbanda womvula oyindji oshoka ngele efundja lye ya ohandi tembuka pehala lyandje ndi ka konge mpoka kaape na omeya. Onkalo ndjoka ombwiinayi oshoka ohayi kanitha omaliko getu,” Kandume ta ti ngaaka.

Ta gwedhapo ta ti nonande e na ngaa uumbanda womvula onene, okwa udha wo enyanyu oshoka iimuna yawo mbyoka ya hupa po otayi ka hupa woo, omolwa omvula ombwaanawa.
Shiyenga shaNangombe ndjono ye ga tile pevi okupendukila Omaandaha goshiwike shika unene mOngwediva nOshakati oya nyanyukitha oshigwana oshindji.

Aakalimo yomOngwediva momikunda Okaandje, Iikango oshowo  Onamutayi oyali ya piti ongula yOmaandaha taya kutha omatemo ya ka patele konima yomvula sho ya sheka.
Yamwe oya li ya kutha oondongi dhawo ya ka pulule omapya gawo oshoka omambakumbaku oga pumba pethimbo ndika. 

Oya ti inaya hala okumana po ethimbo oshoka oya hala sho tashi ka thika pokili otaya limi nale noya tokola okulonga iilya nuumvo, oshoka nuumvo  oya dhengwa kondjala omolwa omvula inayi loka nawa omumvo gwa yi.

Aakulupe oya li taya imemeha ye uvite ombili, taya pandula Pamba omolwa omuloka omwaanawa. Taya ti oye na omukumo kutya omvula yonuumvo otayi ka loka nawa.

Iimuna oya li ya piti tayi li nokunwa omeya ga lokwa komvula miishana. Uunona naakaluntu oya li taya  hiki oondigolo, anuwa nomukaga masiku gwa yi.

Aaakalimo yomOngwediva oya li taya kwata omafuma ngoka omvula ya zi ko inaye ga lya nawa. Taya ti oku na ashike omasiku omashona ya lye oohi, omahandagali oshowo omboga ngele omvula ya tsikile okuloka nawa.

Iishana oya dhingolokwa komeya nomithima odha udha, shoka tashi ulike kutya omvula oya loka nawa lela momudhingoloko gwaNgwediva nOshakati.

Maria Mushimba gwomukunda Okaandje okwa ti ina hala okumana po ethimbo nande, oshoka omvula ya zi ko inaya longa nawa momapya gawo. Ta popi ta ti keshi wo natango ngele omvula otayi ka loka nawa nuumvo nenge otashi fe shomumvo gwa yi.

Oyendji oya li ya lombwele Kundana kutya nuumvo oye na okulonga ya itula mo ngele omvula ya loko nawa, opo ya ka udhe iigandhi yawo yiilya mbyoka ya pwa ngashiingeyi.
Mushinda okwa ti oya kala taya landa iilya komatala, onkene ina hala omvula tay ya shikale sha faathana nonuumvo.

Aanyasha momikunda ndhoka oya li taya taakana iishana yomeya taya kongo omafuma ngoka aniwa ye ga uvite taga zimi sho yeli momagumbo.