Victoria Kaapanda

ONGWEDIVA-Omwiimbi gwoongalo, Henrich Razarus a tseyika nawa Sillicon okwa pititha oalbum omwedhi gwa yi ndjoka tayi nyuwitha omakutsi ga kehe ngoka te yi pulakene.

Silicon ngoka te shi enditha nawa moalbuma ye ontiyali yedhina “Ready for Inspection” ndjoka tayi dhana onkandangala moNamibia alihe nuunene monooli ayihe, okwa tamekele oku imba omvula ya zi ko sho a li a pititha oalbuma ye yotango yedhina “Onkugo yepongo” nonande a kala noku imba omanga e li mosikola.
Moonkundathana naKundana oshiwike shika okwa ti, ye oha iyithana onge omuhikingalo gwoshili lela oshoka ke na kutya oha hiki oongalo dholudhi luni ashike kehe oludhi lwongalo ambala omo lu li moalbuma ye ompe.
Okwa li a londodha kutya nuumvo otapu ka tya pwaka, oshoka aaholi yoongalo dhe okwe ya longekidhila oongalo oombwanawa kaa ku na we.

“Elalakano lyandje lyokuluka oalbuma yandje “Ready for Inspection” okugandja etumwalaka moshigwana kutya onda ilongekidha okuninga omapekaapeko gonkalamwenyo yandje oshowo moongalo dhandje,” Sillicon ta ti ngaaka.

Okwa tseyitha kutya oalbuma oyi na ehwata lyoongalo 17 ndhoka dhi li mumwe ano omaludhi ga yooloka, mwa kwatelwa uungalo mboka a li a pititha owo awike omvula ya zi ko wu li utatu.
Silicon okwa kutha onkatu onene natango sho a pititha okavidio kedhina “Benekand Durban” natango omwedhi gwa zi ko hoka taka adhika koYutube ngashiingeyi, noka holola kutya otaka hokitha.
Moongalo adhihe dhi li moalbuma okwa li a kwathelwa kaahikingalo yayooloka ngaashi Ndawana, King –max, Chice, Tungsten oshowo D-fenya.

Silicon okwa li wo a kwethelwa komaludhi goostudio ngaashi  Y.K.M.P, oshowo kuVDK Crazy Boy ,Dj  Wi Clip oshowo Dj Kayno.

“Onda pandula kehe gumwe a kala nokupa ndje omukumo okutsikila nokwiimba oongalo dhandje, kaandi hulile ondjilakati, oshowo kehe ngoka a li a kwathele ndje mokwiimba ano Pamba ne ya pe omayambeko gongushu.” Sillicon a popi ngaaka.

Omuhikingalo nguka oha ende ta landitha oalbuma ye ndjoka tayi pulwa nayi nayi moshigwana naangoka te yi pula, ote yi mu faalele ye mwene. 
Oalbuma ye otayi adhika konyala moositola adhihe hadhi landitha oongalo muNamibia alihe. Kehe ngoka ta ka pumbwa oalbuma ndjoka tayi hakanwa oshoka uungalo wu li mo uutoye unene, na dhenge kongodhi 081 827 9187.