Ngashiingeyi uutalala sho we ya, yamwe yomaakwashigwana onkene ngaa ya iyadha taya dhengwa kuutalala sho kaye na omakumbatha gwokwiisiikila noshowo ye li moombashu dha tya oombululu oshoka odha ningwa niipeleki yoondoloma.
Efamilia lyaantu yahamano oya iyadha taya lala ondangala molwa uutalala oshoka oya pumbwa ekwatho lyomakumbatha noshowo iikulya oshoka otaya lala woo ya tala omundilo.

Omulumentu gwepipi lyopokati omukokele ngoka a li a kanitha omeho ge manga a li ta longo mokampani ye koWalvis Bay mo2012 okwa iyadha ta mono iihuna ,onkalo ndjoka ye mu thiminike opo e ye kOvenduka a konge omukwathi.
Naobeb Manfred omunamimvo 52 okwa hokolola onkalamwenyo ye ku Kundana kutya nonande okwa li omuntu e na oonkondo nokwa li a tota po onkampani ye ndjoka ya li hayi tungu, tayi painda noshowo okufikila onkene ngaa a li a penduka ke wete ko nonkalamwenyo oya li ya hulu nonande oku na omwenyo.

“Onda li ashike nda penduka kandi wete ko. Onda li nda yi koshipangelo ashike sigo onena kapu na shoka sha ningwa po komiti shoka tashi vulu oku monithandje ko,” osho a hokolola ngaaka.
Okwa popi kutya okwa li a longitha oshimaliwa she shokampani e ta yi koSouth Africa a ka konge uunamiti wokolela ashike natango inashi kwatha sha.
 “Sho nda zi koSouth Afrika onda li nda yi kofamili yandje koGrootfontein, na kakwa li naanaa ku na esiloshimpwiyu lya gwana   nokwa li tandi mono iihuna oshoka aamwameme mboka nda li puyo kaya li taya longo,” osho a hokolola ngaaka.
Okwa li woo a tsikile ko ta ti kutya onkalo oya kala tayi mu piyaganeke nokwa li a tokola opo a lunduluke mo mondoolopa moka a vule okumona omukwathi.

“Onda li nda tokola okuya kOvenduka opo ndi konge omukwathi gwomukiintu a vule okukala ta sile ndje oshimpwiyu. Na hewa onda li nda mono po omukiintu gwandje ngoka,” osho a hokolola ye ta ulike omukiintu gwe ngoka  e na okanona komvula yimwe.
Omulumentu ngoka okwa hokolola kutya okwa li ha lala momulamba oshoka ke na mpoka ta zi ihe okwa li a mono po Elfriende Nowases noya hokana muNovemba omvula ya za ko.