ONGWEDIVA  - Aanyasha ya dhewulilwa okuhondja  kepangelo lya-USA okupitila moproyeka tayi ithanwa DREAMS mehangano lyoProject Hope otaya humu komeho nawa.
Aahondji yaheyali moshitopolwa shaKhomas yomongundu yayakwawo ya dhewulilwa nayo, oya gandja uumasika wu li 300 kehangano Project Hope, mboka ya li ya hondjo wu longithwe okwiigamena nokukeelela oCovid-19.

Elalakano okukwathela aanyasha oshowo mboka ye li momikunda haya yi kosikola yoprogalama DREAMS uuna taya ningi iigongi yawo yi na sha nonkalamwenyo yoomeme nenge yaakiintu ya ikeelele komukithi gwoCovid-19.
Ambasanda gwa-US Lisa Johnson okwa li a pandula aanyasha mboka, sho ya li ya longitha nawa ikwamashina mbyoka kwa li ya pewa okupitila moproyeka ndjoka nokuyapo nongeshefa tayi kwathele oshigwana.

“Ondu uvite nawa sho nda tala pe na mboka taya humu komeho, unene mokuhondja uumaska, mboka wa pumbiwa pethimbo ndika lyomukithi tagu dhana onkandangala muuyuni awuhe. Shika otashi ulike kutya epangelo lyoU.S olya kwathela lela noonkondo,” Johnson ta ti ngaaka.
Ta gwedha po ta ti, oprograma DREAMS oya li ya dhewula aakiintu mboka okuhondja noya li ya pewa omashina gwokuhondja ge li omulongo niilongitho iikwawo yokuhondja.

Johnson okwa li a yelitha kutya oya li natango ya pewa iiyata yokuhondja kuUministeli wikwafambilika nomashingitho. Ta ti kehe okangundu kaantu yaheyali ya dhewulwa ohaka hondjo uumasiku wontumba mesiku mboka haya ka landitha N$20 nenge N$25.
Ta ti, aanyasha mboka ngashiingeyi oye li pomahala ga yooloka moshitopolwa ashihe shaWindhoek taya longo iilonga yawo. Shika osha kwathela oyendji mboka ya kala momagumbo kaaye na iiyemo yasha. 

Omupopiliko nomugandjimayele gwoUnited States of Embassy Walter Parrs okwa ti, oprograma ndjoka yoDREAMS oyi li miitopolwa ngaashi Khomas, Oshikoto oshowo Zambezi, ihe otayi ka andjanekwa sigo Oshana noKavango kokuuzilo momasiku omashona tage ya.
“Miitopolwa moka mu na oprograma yoDREAMS oyi na aanyasha ya pita po 12,000 nongashi kumwe, ye na ooproyeka dha yooloka taya ilongele kuyo yene,” Parrs a popi ngaaka.