• July 14th, 2020
Login / Register

A longa okashina kolusheno lwoonte dhetango niikaha ye



Victoria Kaapanda

ONGWEDIVA-Omugundjuka gwomimvo 26 Miguel Wilhelm okwa longo olusheno nuunongo womadhilaadhilo ge. Wilhelm okwa longa okashina kolusheno hoka ha ka longo ka fa osola, ta longitha oonte dhetango.

“Okashina haka onda tameke nako momumvo 2015 moka kwa li nda mana ondondo 12 posikola pErundu Sekondele, konima sho kwa li ndalongwa oshilongwa shoka tashi ithanwa Physical Science, shoka sha li sha patulula ndje.” Ta fatulula ngaaka nuuntsa.

Ta hokolola ta ti oshilongwa shoka osh ali she mu patulula nokwa tameke ta dhilaadhila iinima oyindji nkene e na oku yi eta po ta longitho omikalo ndhoka a longwa moshilongwa moka.

Ta ti ethimbo a kala e li mongulu ta longwa omutse ogwa kukuta ashike ta dhilaadhila nkene e na oku eta po olusheno kuye mwene, sigo a tameke okulonga okashina hoka nena take mu minikile megumbo.
“Okashina haka nda longo noonyala dhandje ohandi ka longitha  okutyaatyela oongodhi, okuminikila, okutula ko evayiyela oshowo kehe shoka hashi longitha oonkondo dholusheno oonshona. Ohaka kwathele ndje lela oshoka mpaka handi zi kape na olusheno,” Wilhelm  ta ti ngaaka.

Ta ti sho a li a mana osikola ye pErundu ina tsikila we kiiputudhilo yopombanda omolwa oshimaliwa kasha po. Ta ti okwa kambadhala okuninga omayindilo olundji opo a ka tsikile eyilongo lye ashike kape na oshimaliwa shokufuta osikola.

Ehalo ondi li na lyoku ka tsikila osikola opo wo ndi gwedhe ko kontseyo yandje ndjika ndi na nale, ashike oshimaliwa osho ashike sha kwata ndje.
Ta hokolala ta ti molukanda lwawo okwa tula mo omagumbo ge li gatatu olusheno lwosola, a longitha ashike ontseyo ye mwene.

Ta ti eyaha ndoka lyoDstv okwe li longitha onga oshikwatelo she, hoka a kankeka omasiipili haga kala ga talela ketango, dho onte dnhoka tadhi idhenge momomasipili tadhi tsakanene mokapakete moka ke li komeho gesipili moka a tulakumwe nduno opo olusheno e lu ete po.

Wilhelm ta hokolola ta ti okashina hoka oke na wo emanya ndyoka ha tyaatyele ethimbo ku na etango, ndyoka he ke li longitha uusiku oshoka kaku na etango.

Okwa li a hokola ta ti okwa li a longa po natango ondhila yokutuka mombanda, ashike kakwa li e na okarimowuta. Inima yiikwamalusheno okati komokutsi kuye ta ti ngele oshinima okwa hala okushilonga nenge oku shi eta po ohe shi kongo ashike komalungula.

Ta ti  oha lesha  ashike nkene e na oku eta po oshinima. Ngaashi okupangela ikwamalusheno yomiihauto nako inaku mu thiga po.

Kundana oku uvite kutya Wilhelm ngoka ha zi nayina naamwayinakadhona ye li yaali, oku li mompumbwe nehalo lyoku igwedhela ko kontseyo lela ashike oshimaliwa shokufuta osikola kasha po.

Okashina ke kolusheno otaka kwathele unene mboka kaye na omalusheno. Ta ti ke na nando edhilaadhilo lyokukalandithapo oshoka oko oshiulikilo  ontseyo ye kombinga yolusheno, ashike shoka a hala ekwatho ashike lyokutsikila eyilongo lye.

Samuel Uushona ngoka a li a fuulwa kiilonga yomumati omugundjuka okwa ti, mbaka oyo aantu ya pumbwa okukwathelwa kepangelo.

“Ngaashi omuntu e li ngeyika okwa pumbwa ashike eyambidhidho lyontesyo yi ye komeho, oshoka ndjoka yuuvalelwa mo oku yi na nale,” Uushona ta ti ngaaka.
Ta ti epangelo nali tale po nawa paantu mboka taya vulu okukwathela okulonga noku eta po sha tashi yambula po oshilongo nokukwathela aakwashigwana.
 


Staff Reporter
2019-10-17 07:19:02 8 months ago

Be the first to post a comment...