• April 8th, 2020
Login / Register

A mangwa po molwa eso lyokahanona


Victoria Kaapanda

ONGWEDIVA-Omukiintu gwomimvo 24 okwa mangwa kopolisi sho a li a mangele monailona, nokudhipaga ohanona opo ya valwa mEtiyali lyoshiwike shika molukanda Uupindi mOshakati.

Omugandjimulombo nomugandji gwomawuyelele gwopolisi moshitopolwa shaShana Thomas Aiyambo okwa ti oshiningwanima osha ningwa potundi 10h00 yongula. Aiyambo ta ti omukiintu nguka okwa patululilwa oshipotha shedhipago, nosho kuholeka oluvalo. 

“Otaku hokololwa kutya omukiintu ngoka a li e li metegelelo okwa li a dhimbululwa kukuume ke kutya ina ihumbata we, noku mu pula kutya okanona oke li peni. Okwa li e mu lombwele kutya ine mu pula we omapulo ga fa mpoka ye ine shi popya komuntu na shi kale oshiholekwa pokati kawo yaali,” Aiyambo ta ti ngaaka.
Omufekelwa aniwa okwa li a yi molukanda pethimbo ndyoka, nakuume ke okwa li e shi lopota kopolisi. Okanonakokamati oka li ka adhika mondunda yomufekelwa ka tonyenwa monayilona. 

Opolisi otayi pandula noku indila natango aakwashigwana ya tsikile okulopota iiningwanima yatya ngaaka.
Natango opolisi moshitopolwa shaMusati oyi li molukongo lwomukiintu ngoka i ikutha epunda e ta ekelehi ohanona tayi tengenekwa poomwedhi ndatu ndjoka ya adhika metoto lyiiyagaya mOutapi mOmaandaha gwoshiwike shika. 


Staff Reporter
2020-02-13 09:07:14 1 months ago

Be the first to post a comment...